好多酒吧嘅工作人員都取笑我：「你老哥蒲吧勤力過開工喎！」呢樣嘢我認㗎，有酒飲、有波睇，偶然仲結識到異性，梗係精神過做嘢啦。所以，我係年中無休，夜夜笙歌嘅！講起歌，其實酒吧嘅音樂都可以好正㗎，好似今日介紹呢間有Live band嘅「V Bar」，就係一個好例子。文、攝：吧少
高音甜、中音準、低音勁，我啱㗎。唔少老友鍾意去聽演唱會，但我覺得場地太大，為咗遷就山頂嘅朋友，聲量往往調得過大而失真。相對上酒吧玩Live band，喺音色方面更加顯出表演者嘅實力，呢種先至係真正嘅現場感。
諗起聽歌，好自然就走咗去深南大道嘅「V Bar」。呢間開喺酒店嘅蒲點，以「老外場」聞名，客路斯文，人流唔雜，所以，唔少女性都放心嚟玩。
啱女性消遣
嗰晚我幫襯靚女推廣員叮叮叫咗支啤酒，飲兩啖壯吓膽，然後就用半鹹淡英語同兩位西洋女士搭訕。原來佢哋係嚟深圳做嘢嘅，公餘時間都喜歡嚟聽吓歌、飲吓嘢，Relax吓。我讚佢哋識揀地方，事關呢間吧嘅Live band絕對有其江湖地位。
成日都話音樂係人類嘅共同語言，我同洋女士嘅溝通亦因為有音樂作橋樑而更加輕鬆愉快。之後，我又跟鄰枱一對姊妹花混熟。佢哋係一間外資公司嘅文員，之前跟啲鬼妹同事過嚟玩，覺得呢間場幾啱女性消遣，家一得閒就會嚟聽Live band。着黑色衫，講嘢斯文淡定嘅寶玲話，聽吓歌，工作煩惱都無晒。咁多靚女為公為私，我以後都要多啲嚟玩，同佢哋深入了解吓至得嘞！
V Bar
地址：深圳市南山區深南大道9026號「深圳威尼斯酒店」
電話：（86）755-2693 6888 （Ext 8011）
酒水收費：啤酒¥35/支