現年44歲的馬天如毅然在25歲那年開始接受變性手術，他表示小時候媽咪帶他去買裙就會喊，一行男裝就不願走，10多歲時已萌變性念頭。
梁：係咪因為缺少父愛，所以想做男仔保護媽咪？自細就開始想做男仔？
M：媽咪同我講話我細個好得意，同我去行連卡佛帶我去買裙就會喊，一去行男裝就唔走，想買煲呔西裝，我唔着裙。細個玩玩具都係刀刀槍槍飛機大炮，唔玩公仔。
與男仔有交往過
【梁：主持人梁泰來 M：馬天如】
梁：未轉性別前，有冇拍過拖？
M：細個都有追求者，係男仔，有交往，嗰時歲數唔成熟，當拍吓拖仔，當時讀女校，個個女同學都有男友，好自然嘅事，冇特別抗拒，但最後都做番朋友多。
梁：幾多歲確定改變性別？
M：10幾歲，一早已經有咁諗法，好多時間同媽咪商量，見好多醫生。
梁：第一次同媽咪講，佢反應係點？
M：佢一啲都唔驚訝，我係點佢仲清楚過我。做手術佢擔心我，呢件事上我冇壓力，大家傾得好透徹。
梁：呢個決定對一個媽咪嚟講係幾大shocking，佢冇阻你，其實想唔想你做手術？
M：每一個媽咪撇開其他問題，只想自己小朋友開心快樂，佢好明白，如果反對佢一定會講畀我知。
梁：報道話你25歲第一次做手術，中間係咪要長時間觀察？
M：要，醫學上心理上要長時間，唔係食餐飯。
梁：同媽咪第一次講做手術，有冇猶豫？
M：冇，媽咪仲驚我喊，驚冇咗啲嘢我接受唔到，手術啲藥未過晒我已經笑，因為達成一個心願。差唔多30歲完成。我個人唔怕痛，唔記得痛唔痛，開完刀身體上痛係有，但唔係嚴重到記到家。媽咪次次喺我身邊支持我，真係完全無悔。呢件事媽咪做好心理準備，我就冇顧慮太多，自己生活比起傳媒點寫嚟得重要。
手術後靚聲消失
梁：變性令你有得有失，冇咗把靚聲？
M：嗰時我會去Christian Samson度唱歌玩吓，佢有叫我出碟。手術後我把聲變咗，以前唱就高低音來去自如，我有時講笑同朋友講我要封咪啦。
梁：係咪改變性別先有真正關係？之前一段感情七年，係咪想過儍事？
M：係，後來都冇，因為我仲坐喺度。呢方面我好欣賞媽咪，得佢喺呢啲最難受嘅時候同我傾，舒緩到我，畀咗好好意見我，對於處理感情佢好拿手，我嘅情緒因為咁而穩定。