港交所（388）展覽廳開埋今個星期閂門裝修，老臣子霍廣文（Lawrence）做埋今個星期亦退休去了。Lawrence喺交易所做咗廿年，服侍過周文耀、徐耀華、鄺其志同李小加四個老闆，資歷同功力都相當深厚。華華入行之初，第一個識得嘅交易所高層就係Lawrence，事關佢92年由證監會跳入交易所上市科，做咗呢瓣好耐，上市儀式多數見到佢，佢對傳媒圓滑得嚟，相當友善，2000年兩所合併後，佢升職退居幕後就逐漸少去上市儀式喇。Lawrence今年已經63歲，一早過咗退休年齡，傳聞話早幾年周文耀退休，港交所唔想咁多老臣子走，所以同Lawrence續約三年，呢個星期尾夠鐘。港交所過幾日會喺交易所展覽廳幫Lawrence搞個歡送派對，認真有人情味。Lawrence話，退休後冇任何計劃，連旅行都未諗。咁又係，退休後大把時間慢慢諗啦。