外籍練馬師G先生來港一行，住在菲林明道一間酒店，為佢方便，於是約佢在福臨門飲茶，方便佢行路過嚟，容易搵。G先生入到嚟，滿頭大汗，講番句，How are you to die (today)? 左丁山聽慣澳紐發音，不以為意，即刻叫杯青島啤，等佢解熱，香港溫度高唔緊要，最攞佢地命者其實係濕度，佢行咗一條街走過嚟，真係好似想die。
飲啤酒，最好叫春卷與椒鹽雞翼俾佢嘆，一飲一食，G先生大叫very good，豎起大拇指，講一聲：「香港好過廣東多多聲！」原來佢來港之前，曾應香港朋友之請到廣東一行，增廣見聞，一個星期所食之餸菜，肥膩到極，味精又多，兼且又鹹，食到佢吃不消，最尾兩日只敢食菜，幾乎變咗係吃素人士。福臨門點同廣東啲一般食肆呀，佢當然連聲讚好不絕。
外國人話廣東上海北京食物太肥膩，左丁山已聽過好多次，此乃內地習慣，冇得改。日本通馬迷S常到日本辦貨做buyer，買完就上大陸搵內地拍拿散貨，憑着日本「貨真價實品質高」之名，果然搵到食，生意不愁，愁嘅就係經常到內地，少不免要應酬食飯，可能影響健康，馬迷S話：「我每個月到日本一次，大吃大喝不在話下，日本乾淨企理夠衛生，我好放心。但去完日本買貨就要返大陸，我在大陸吃飯有兩個堅持，一就係只在大酒店餐廳，不出外，不理會甚麼風味名店，二就是只喝在日本買到嘅綠茶，常備茶包，其他內地酒水一概不飲，身體要緊吖嘛，在內地好驚飲到假酒，吃入地溝油㗎！」
驚得咁緊要，有崇拜日本之嫌，傷害民族感情。某日同佢在置地廣場賀菊食日本餐，佢食toro食得興起，佢叫左丁山如果去到東京，要到銀座久兵衛試吃一次真正鮮活魚珍品，不過價錢好貴又難訂位，佢上次去為咗招呼日本出口商，特別在久兵衛請客，六個人食咗三十萬円，已經係日本人俾面佢，點菜夠克己而已。有一位香港豪客以前鍾意久兵衛，直情坐私家飛機到東京，吃過久兵衛魚生就回程返港，出手闊綽，豪氣凌雲，曾經令日本人讚嘆：「大丈夫當如是也！」嘩，邊個咁為香港爭光呀？馬迷S話：「傳出係一位疑似風水大師喎！」跟住舉起杯綠茶，哈哈大笑！