有市民為品嚐Paul叔種的有機蔬果，親往農莊即揀即摘，也有到網上落單，買滿100元，他會親自駕車送到府上。每逢星期二、五送貨。親自送貨，不會連油錢也蝕了？Paul叔說「人客係要儲㗎，如果每區得一個客要100蚊菜就一定蝕，但如果有十個客，就有得賺」。
可降低蔬果成本
堅持連送貨也一手包辦，Paul叔解釋，只為降低蔬果價格，讓更多家庭嚐到有機的好處。「市場普通菜賣十幾蚊斤，我哋有機菜就賣廿幾蚊，差不多貴一倍，不過有啲農場嘅有機菜就賣到三十幾蚊，我哋又平番一截。」經營農場一年多，共花費數十萬元，現時每月租金、種子肥料及兩個工人薪水，固定開支約二萬多元，剛好達收支平衡。Paul叔笑言：「我自己冇糧出嘞，不過最想都係快啲搞好農莊配套設備，到時就可以坐低飲杯茶嘆吓！」《蘋果》記者