一代奇女子狄娜（原名：梁幗馨）低調離世已經兩年，其現年44歲的變性兒子馬天如心情日漸平復，早前接受商台訪問，首度開腔談及他與亡母的微妙感情，當中憶述狄娜05年在家中邊行邊滴血，鎮靜入院檢查，始發現身患子宮頸癌；至狄娜臨終前，母子怕觸動死別的傷痛而沉默不語，當狄娜與兒子嚥下人生最後一碗芝麻糊，即使吃完即吐，亦能細味母子濃情。
低調的馬天如（Michael）早前接受今日首播的商業一台新節目《1圈圈》訪問，該節目由吳綺莉、楊崢和梁泰來做主持，逢周一至五早上十時半至十二時播出。Michael在節目中首次披露母親的骨灰已由他親手撒落海，又談及母親生病時的情況，訪問會一連五日播出。
【梁：主持人梁泰來 M：馬天如】
梁：狄娜姐姐05年發現子宮頸癌時情況係點？
M：媽咪係一個工作狂，當時佢幫電視台做節目，有一日做完錄影返屋企，喺屋企行來行去發現周圍都係血，先發覺自己有問題。當時佢依然鎮定，佢就係嗰啲就算胃潰瘍都可以頒完獎先送去醫院嘅人。見到周圍血都冇得拖，即時去check，佢份人性格好強，唔會俾人睇到佢擔心，佢一切如常當冇嘢，當時佢絕對有諗過係醫得番好，正式入院做大手術兩三次。
梁：2010年3月狄娜最後入醫院，有冇諗過冇機會出院？
M：佢有咁嘅心理準備，因為佢最清楚自己唔舒服到乜嘢程度。如果佢知道自己病情去到比較晚期，佢唔會再fight，佢覺得係一種冇意義嘅fighting，加上佢病情都好複雜，因手術引致好多問題，所以心裏有數。
希望大家永記美貌
梁：到狄娜入院最後階段，冇人可以去探佢，係咪佢意思？
M：呢個係佢嘅指示，佢連最親嘅人都唔見，我諗呢個係佢貪靚嘅原因。佢臨尾仍然好有幽默感，靚咗咁多年唔想bye bye時唔靚，怕嚇親大家，想大家記住佢最靚嘅樣。當時佢會放電話喺身邊，精神好佢又想聽，就會親自接電話，否則就交畀秘書。
梁：狄娜係咪去到後期已經唔可以進食？
M：佢都有堅持自己食，但係食乜嘔乜，媽咪最鍾意食芝麻糊，有一次我買畀佢食，嗰次係最後一次我同埋我女友、媽咪一齊食嘢，可惜食完冇耐就嘔番出來，但係個過程好甜。病嘅期間佢都有同我講想食腸粉，佢口味都好傳統，不過因為食藥令到口味唔同， 一食落去唔同味佢就唔想食。另外我好記得去到後期大家唔係好講嘢，一切心知，加上一講呢個問題大家會太傷心，佢冇辦法同我say goodbye，我亦唔想同佢say goodbye，變成最後好長時間好少講嘢，幾乎零溝通。
梁：狄娜有乜心願未了？
M：媽咪唯一擔心我同佢哥哥，佢同舅父之間嘅事有默契，長輩之間會自己安排。
骨灰撒海回歸自然
梁：狄娜喪禮好靜咁舉行，係咪事前同你講好點做，同埋有指骨灰已經撒落海？
M：佢講得好清楚，媽咪仲知我唔鍾意講呢啲嘢，但一定要交代畀我。張相係佢好鍾意嘅，骨灰撒落海係我親自做。媽咪之前半講笑話我唔會有小朋友，話過咗我嗰代冇人睇佢，佢又怕蛇蟲鼠蟻，又唔想到任何時節時又要我買橙去煩到我，最想回歸自然。同埋喪禮上播《My Way》呢首歌係佢要求，佢覺得首歌好related to佢，佢好鍾意，喺醫院時我都播畀佢聽。其實媽咪唔怕提及死亡，反而仲好似個鬧鐘咁提我，未有病時都同我講不論接唔接受，呢一日都會嚟，但喺小朋友心目中，媽咪係長命百歲。我之後寫咗一封信話我留住佢嘅血，呢個係無可否認。
梁：你之後叫傳媒代你發聲明，係咪你嘅意思？
M：係！我好幸運做到佢嘅小朋友，而我唔係公眾人物，我只想過普通生活，由細到大都唔想接觸太多傳媒，加上當時心情令我唔想回答太多問題，嗰個階段亦好多事要處理。
童年不喜媽咪再婚
梁：狄娜3月31日去世，第二日透過傳媒發聲明話「刀槍能夠殺人，筆墨可以救人」，係咪寄語傳媒一啲事？
M：我好誠懇咁答你，真係唔清楚，佢個腦每秒一千轉，所以佢好鍾意做live show，亦唔鍾意有稿，成日都係即時發揮，永遠冇人諗到佢下一分鐘想做乜。
梁：狄娜有奇女子之稱，後生時拍過艷情片，你有冇睇過？
M：媽咪冇特登唔畀我睇，我唔會特登買，我係有睇過，覺得呢個係一個藝員嘅選擇。人人都有歷史，我哋一直互相尊重對方決定，係好朋友。
梁：從媽咪做生意上，學到啲乜？
M：我佩服佢嘅應變能力同急才，唔係一般人做到，佢嘅失敗之處就係唔夠奸，佢好講原則、個心好好。同埋我唔會做生意，只想平凡過生活，同佢一齊已經夠刺激。
梁：傳聞狄娜捐好多錢畀國家，同好多國家猛人周旋，你有冇見過呢啲猛人？
M：呢方面傳媒資料應該多過我，佢要見任何人物，大同細都好我唔會知係邊個，我只係small potato，佢同人介紹我時都係話我係員工，況且我唔係太鍾意去呢啲場合，特別係唔鍾意牽涉政治。
梁：對媽咪印象係點？
M：佢唔惡，心目中好鍾意由早到晚都見到佢、黐住佢，咁多年佢只係打過我手一次、對我好嚴，不過唔需要打，一個眼光已經夠晒。同埋我哋係好朋友，任何決定都會尊重，我8歲就去瑞士讀書，因為佢想我接受外國教育。到我16歲時想返嚟，佢冇反對就叫我返啦。
梁：狄娜咁靚係咪好多追求者？佢有冇諗過再婚？
M：多定少點定義，總之有。再婚呢個問題，因為細個時佢俾我蝦，唔鍾意媽咪再婚，我真係咁同佢講，佢又好錫我之後話好。到我再大啲佢冇時間，最後佢覺得唔需要。其實我都想佢身邊有一個可以同佢傾到偈嘅人，不過佢絕對唔會為咗呢啲事感到遺憾。
與父親關係甚疏離
梁：你手上有同媽咪去BBQ同出海嘅相，又有佢煮嘢食，佢識唔識煮嘢食㗎？
M：佢病好返屋企時，知我鍾意食意大利菜都有煮畀我食，同埋手上每張相都好珍貴，好似要佢咁casual去BBQ應該得一次，出海就好似多啲。
梁：你小時候，明唔明白父母離婚嘅事？
M：大個有問，當時佢覺得做唔到好妻子，公平起見就離婚。我心中只有媽咪，有佢已足夠。
梁：99年有篇報道，你爸爸話佢同你冇血緣關係，你有乜反應？
M：幾突然，媽咪反而擔心我唔開心，事實我又冇，因為我心目中佢唔係好重大意義嘅一個人，佢講乜affect唔到我。媽咪只係擔心我心靈，我哋傾完偈仔，兩分鐘話冇事佢就信，之後就唔會再提，件事亦都過去。
撰文：林妃
