聯儲局官員發放嘅QE3消息，一日話放、一日話收，擺明造市，可能睇到火都嚟。不過晉佳對於聯儲局「玩嘢」就相當受落，估計成功測試QE3受市場歡迎後，就會順勢推出。上周三至周五QE3消息係「放、唔放、放」，美股就「強、弱、強」，反映放水消息輕易左右股市，儲局有機會喺大選前推QE3助慶，希望以升市保住奧巴馬連任，亦防止共和黨上場令伯老烏紗不保。此外，一年前歐債危機、溫州爆煲憂慮令市場恐慌，當時大家覺得連放寬貨幣政策都冇用；家市場對於貨幣政策消息反應，已經凌駕歐債危機消息，睇嚟QE3嘅振奮作用比一年前更大。綜合呢兩項觀察，晉佳對後市信心大增。上周四晚，三江化工（2198）公佈中期業績，純利升28%至2.03億元（人民幣．下同），每股盈利20.19分，扣除其他收入，稅前盈利基本持平。公司主要產品係環氧乙烷，可以用喺清潔劑、醫療、畜牧等，近年亦用作水泥添加劑，用途不斷增加，期內環氧乙烷銷量增長38.1%，平均售價跌8.7%至每噸9693元，毛利率反而升1個百分點至20.6%，以上半年環境已算唔錯。帶動股價翌日曾勁升一成，收市升幅收窄到3.3%報2.17港元。公司唔派中期息，主要由於佢淨負債有12億元，淨資產負債比率70%，令上半年融資成本大升1.8倍到3370萬元。由於債重，未來融資成本壓力會進一步增加。
低吸三江化工炒上落
雖然業績OK，但未來都幾高風險。2013年底，三江化工產能將倍增，之後仲要擴展第5期環氧乙烷產能同發展上游甲醇制烯烴業務，到時要借多26億元。一旦環氧乙烷大冧價，間公司就死得。三江化工面對投資者擔心市場供過於求、產品價格波動、過度擴充以致債務沉重等因素，未來幾個月市盈率唔會高得去邊，5、6倍算係合理，假設下半年盈利有上半年八成，市盈率就5倍，估值唔平唔貴，可逢低吸納，喺2至2.60元（港元．下同）之間炒上落。如果未來幾年環氧乙烷價格穩步上揚，三江就會發大財，以小注All or nothing心態落注，博起碼翻幾番亦未嘗不可。晉佳本欄逢周一、三及五刊出