以瘋狂來形容現時本港樓市，相信沒有人會反對︰豪宅OPUS以天價4.7億元成交；中產至愛的太古城，園景單位呎造萬六；上車客能負擔的200萬細價樓，半年內隨時絕迹；居屋公屋亦頻見新高成交；租金亦因而水漲船高……究竟樓價沒有最貴、只有更貴的局面，何時會完結。「投資導航」特意找來四大名家，為嚴重扭曲的樓市把脈，前線經紀更會現身說法，比較97年及現時市況，希望為大家提供多角度的追揸沽策略。
施永青︰起碼儲五成首期
中原地產創辦人施永青認為，由於環球經濟大環境不配合─本地增長放緩、內地動力減弱、歐洲接近負增長，「現時樓市絕對沒有瘋癲的條件。」
至於近期樓市突然火紅，他直指傳媒也有責任︰「家交投唔算好咗好多，點解報章會話好似97年咁瘋癲呢？」他憶述，當時炒風較現在勁得多，「97年好多人夾份炒樓，借（錢）就借凸晒。」
施永青笑言，今年初已睇好樓市，「當其他人仲睇緊樓價平穩甚至下跌，我已經估會繼續向上。」至於後市走勢，他認為中原城市領先指數有機會衝上110（現時約107），即有約3%至5%升幅。
談及上車條件，他將要求稍為提高︰「以前有超過四成首期，負擔比率低過40%都OK，家要有超過五成首期，負擔比率要低過三成先可以喇。」他寄語無殼蝸牛，現時無謂冒險，寧願等政府推出如「港人港地」措施，屆時可能有平樓買，再上車都未遲。至於中原未來的策略，他以一貫無為而治的口脗回答︰「有得開咪開囉，開到蝕為止。」
曾淵滄︰快上車切勿揀擇
樓價節節上揚，中原城市領先指數屢創新高，不過，有份創立該項指數的城大工商管理碩士課程主任曾淵滄認為，現在樓市熾熱程度跟97年「冇得比」，他解釋：「現時成交完全比唔上97年，但用家會發現買樓比以前難，因為冇炒家，放盤少，一個盤拎出來，俾用家食咗，變成現在冇盤供應，令買家覺得冇得揀。」
不過，他繼續「吹雞」叫大家買樓，揚言「等緊上車的最好都係快點上車，唔好揀擇，買得起就快啲買。」雖然未來兩年新樓供應會逐步增加，而美國息口亦有可能上調，但他認為，短期樓價仍有水位再上。
陳清白︰家買要去驗腦
「感覺到唔對路！」資深投資者陳清白接受本報訪問時，劈頭第一句便這樣形容現時的樓市。人稱白旋風的他，指樓價已經進入不可思議階段，絕對不鼓勵首次置業的人上車，「又唔係冇樓租，家仲走去買樓，真係要捉去驗腦。」
他直言，現時樓市肯定較97年瘋癲，「隨便一個高價成交，已經帶起全港樓市，造成惡性循環。」除低息環境外，他認為樓價高企，兩任特首也責無旁貸，「曾蔭權太放任，任樓價上，梁振英那句『唔會壓低樓價遷就購買力』，更令個市火上加油。」
陳清白早於去年睇淡樓市，但樓價反地心吸力而行，令他不得不承認自己睇錯市，但卻堅持做淡友，「就算喺呢個位跌兩成，我都唔夠膽買，家有SSD，買番嚟要綁兩年，到時都唔知乜事。」
97險沒頂 冇膽博
他坦言，97年爆發金融風暴，樓價由高位插水七成，幾乎令他沒頂，雖然最後安然度過，但膽量也因此變細，「呢幾年真係要鬥儍、鬥唔理智先至搵到錢。」他現時僅持小量早年低價買入的舊樓單位收租。談到未來樓市走向，他認為短期內好難跌，向上機會依然大，但相信不會升得多，成交卻肯定會繼續縮。
張一鳴︰政府隨時出辣招
Neutron INV Partners首席投資總監張一鳴批評，政府為不想推冧樓價，故意推出措施製造需求，令樓價火上加油，但升得急、跌得快，未來本港樓市隱憂好大。「如樓價續升，政府將面對越來越大的群眾及傳媒壓力，屆時出招會更重。」
雖然他同意，目前市場氣氛不及97年般瘋狂，但經濟狀況遠不及當時強勁。他指出，97年時打工仔每年平均加薪一成，但目前全球經濟滑坡，工作朝不保夕，供款能力難以提升，如遇上宏觀經濟危機，「樓市就會大冧。」
張一鳴奉勸未「上車」的準買家切勿於現階段入市，「寧願蝕息都唔好蝕價」，因為於錯誤時間買樓，會一次過損失兩個周期的獲利機會。
瘋狂入市逐個數
1）OPUS成亞洲新樓王
東半山豪宅OPUS全層6200方呎單位，上周以4.7億元天價成交，呎價高達7.58萬元，打破西半山天匯所保持的亞洲最貴分層豪宅紀錄；該盤早前已榮膺全城最貴呎租樓盤，有面積6700方呎單位，以月租85萬元租出，呎租高達127元。
2）粉嶺中心半日貴11萬
新界北區粉嶺中心L座高層8室，單位面積610方呎，月初放盤四日，成功以292萬元售出，呎價4787元。惟業主繼續放售，至即晚更獲另一買家以302.8萬元接貨，呎價4964元。一日內價錢相距近11萬元，升幅近4%，扣除賠定及佣金共8萬元，業主多賺約2.9萬元。
3）公屋居屋王同日誕生
黃大仙竹園北邨桐園樓高層戶，單位面積631方呎，月中剛以285萬元連地價售出，呎價4517元，與青衣長安邨齊稱王，成為香港史上最癲價公屋。同日，鰂魚涌康山花園5座15樓以上E室，單位面積521方呎，吸引至少三至四名買家洽購，最後以452萬元售出，呎價高達8676元，貴絕全港居屋。
