一位慈雲山公屋學生上訴得直，考到5*嘅物理科覆核後，改正為5**，於是呢位「保良局第一張永慶中學」嘅陳思凱同學成為文憑試第六名7科5**狀元，入讀港大法律系，可喜可賀。
前幾日先至碰到公關傳訊界名人，恒隆集團助理董事關則輝，關兄講「社會分享投資基金」如何深化社會資本（social capital），敦鄰睦里，促進社會凝聚力，講到興起之時，佢透露孩童時，家住慈雲山公屋，成層樓嘅住戶都識晒，日日有交流，互相幫忙，反而依家香港人住在大廈，講私隱，閂埋大門，日日見面亦不相識。關兄出身慈雲山，考入港大，從此平步青雲，現在今科文憑試狀元陳思凱又係來自慈雲山，進入港大，三十年後叻過關則輝都唔定。
不過咁，讀法律就唔好情緒用事嘞，「爽報」話陳同學他日想做Law霸，左丁山睇唔明，唔知甚麼叫做Law霸，依稀記得以前「蘋果日報」叫過美國性感明星Lopez做「籮霸」，但小男生Pat Pat點可以稱霸呀？哦，原來係講無綫電視劇，但左丁山從來唔睇嘅，不知是甚麼東東，陳同學話他日要成為大律師，為基層窮人爭取公義喎，確係其志可嘉，值得鼓勵，該校校友名人有傅小慧、蔡耀昌、阮國恒（金管局副總裁），可能慈雲山風水好都唔定。
之但係，睇完電視劇而受到感動，即係還有大把嘢要學，入到港大法律系學習吓理性探討，理智思考，分清楚法、理、情先至講啦，無謂咁快就對住記者講得太多，以免成為他日心理負擔。讀大學方知天外有天人外有人嘅，邊個夠膽稱霸？有老友彈左丁山唔睇電視劇，追唔上潮流，其實追上潮流亦都唔知有乜好處，譬如畢打行A&F開幕，日日嘈喧巴閉，不少朋友唔幫襯都話要走入去睇吓，左丁山就屢次過其門而不入；好多人趁墟去銅鑼灣誠品書店，其實買書又駛乜一定去誠品？香港不少自認前衞知識分子炒作所謂文化現像，其實係自己人寫俾自己人睇，群眾完全冇興趣，呢啲嘢寫得多，講得多，報紙反為銷量下跌㖭！一啲人「佔領中環」（即係霸住滙豐地面通道），美其名曰反對資本主義，請問有幾多群眾參加呀？