《中環雲咸街》
盛女陳霽平與亞視執行董事盛品儒譜出姊弟戀，盛品儒卻未專一相待，昨日凌晨趁女友在家埋首讀稿，他則約會爆乳妹到中環夜蒲狂歡，爆乳妹熱情豪放，當街打盛品儒籮柚，親密關係不言而喻。陳霽平為保正印地位開腔護男友，盛品儒則死撐醉爆斷片。
亞視近年零製作，公司高層卻不停被爆緋聞，現年36歲的亞視執行董事盛品儒最近被爆戀上即將41歲的95年落選港姐陳霽平，兩人早前拍拖睇戲斷正，盛品儒在公眾場合情不自禁摸女友臀部，陳霽平也送上熱吻回贈，令戀情浮面，成功踢走盛品儒的緋聞女友、04年亞姐冠軍呂晶晶。盛品儒和陳霽平仍處於熱戀期，理應甜蜜糖黐豆，但他昨日凌晨2時卻撇低女友，獨自到中環偷歡，他與一名長髮爆乳妹當街打情罵俏，更被女伴當街打籮柚。
一臉享受擺chok樣
盛品儒為保鑽石王老五形象，一直把與陳霽平的戀情收埋，拒確認女友身份，但他們的情侶關係已是公開秘密。陳霽平近日埋首為城巿電訊拍劇，前晚又要為昨早在澳門的司儀工作做準備，無暇黐實男友，令他有機可乘去曳曳。西裝筆挺的盛品儒昨日凌晨偕一名爆乳妹到中環夜蒲，盡興後即拍拖離場，爆乳妹踩住高踭鞋緊隨盛品儒身後，作狀替他按肩，當他們站在路邊等的士時，爆乳妹突然伸出右手連環拍打盛品儒的籮柚，之後更掩嘴偷笑，被打的盛品儒一臉享受，還用手撥頭髮，擺出chok樣回應。
陳霽平昨日下午由澳門工作後返港，記者致電問她最近有否跟男友盛品儒去街？她說：「我呢排好忙，有時一星期先見一次。」陳霽平堅稱與盛品儒是好朋友關係，如果100分滿分，她給盛品儒90分，她輕鬆說：「大家如果拍拖，信任好緊要，我呢條界線分得好清楚。」
當記者告知盛品儒昨日凌晨在中環偷食爆乳妹，還被當街狂拍籮柚，陳霽平聽後即收起輕鬆語調說：「咁搞笑？我覺得冇乜嘢，可能玩啫，如果我係女朋友就會嬲。有機會我會問吓佢，笑吓佢，大家有自由空間。」陳霽平表示不會因盛品儒花弗而扣分，她說：「我揀對象會考慮性格，佢暫時OK，家仲了解中。」
EQ甚高的陳霽平全程包容男友，難怪昨日問到盛品儒是否要為偷食事件諗計番女友時，他在電話訪問中得戚說：「我又冇做錯，我同佢講番兩句囉！」
「飲咗酒唔係好記得」
對於被爆乳妹出股惑挑逗，盛品儒扮失憶說：「我哋噚晚同朋友有飯局，跟住我送佢走，可能飲咗酒，我唔係好記得，我醉咗。」
不過記者昨凌晨在現場所見，盛品儒還會擺出chok樣，酒醉必有三分醒，他對此說：「我係醉，但都肯定自己返咗屋企，阿媽可作證。」爆乳妹的豪放表現令盛品儒非常受落，他說：「嗰女仔比較鬼妹仔，我哋識咗好耐，其實好多女仔都對我過份熱情，我以後會小心啲，玩完都唔會再送女仔返屋企。」盛品儒表示日內將約會陳霽平睇戲補鑊。
採訪、攝影：陳辰、楊浩賢、黃曉程、比華利
筍盤：王征堂弟盛宣懷後人
昨日凌晨偷食爆乳妹的盛品儒，現年36歲，出身顯赫又靚仔，自然成為城中筍盤，他原名盛承灝，是上海四大家族盛宣懷四子盛恩頤的後人，盛宣懷是上世紀初清朝末年的內地首富，在內地創辦了不少重要基建，如第一條南北鐵路盧漢鐵路及第一間銀行中國通商銀行等。
盛品儒亦是本港的上海菜館留園及留園雅敘的少東，留園正是盛家私家花園的名字。他早年留學加拿大，曾經從事IT及銀行業，前年入主亞視任執行董事，亞視老闆王征是他的堂哥。女友除了陳霽平外，亦曾與04年亞姐冠軍呂晶晶傳緋聞。
