廣南（1203）嚟緊星期二派成績表，股價再跌，兜底。廣南就2012年半年度業績，發咗盈警，部份原因係非經營因素，加埋上半年原材料價，又係舞龍咁舞，所以，純利會大減。但要咁睇，廣南主打馬口鐵及鮮活食品加工，兩瓣數涉及民生，而阿爺又肯落實以內需推動經濟嘅長期政策，尤其前邊馬口鐵項目，中線應該食到內需潮。Before that，廣南家陣得番0.87元，NAV折讓上到六成樓上，加埋手頭現金4億銀，應該好易度過風雨期。又呢期推介兩隻抄底股包括中外運（598）及中國製藥（1093），有唔錯表現。廣南價殘，反映唔少負面嘢，有機。呢轉廣南業績公佈，一質穿0.8元撈底，中線上番1蚊，有貼近30%回報，兼未有耐上到NAV2.25元。
隆成息高現金牛
隆成（1225）亦係嚟緊呢個星期派半年度成績表，而集團就發盈喜，話純利有改善。隆成業績既冇後顧之憂，而集團上年底嘅淨現金超過兩億銀，現金牛，有咁上下防風力，加埋業績改善，應該有番唔錯嘅息率回報。績前吼實0.77元兜轉，博炒業績期，上番1蚊，回報率又係近三成，亦未有耐上番NAV1.4元。
錢雋