老一輩眼中，油尖旺，油麻地從來第一，縱然已沒從前平民夜總會的熱鬧；年輕一代，視YMT為新舊文化交滙點，少了點生氣卻充斥人情味……但肯定的是，經十號韋森特蹂躪後，榕樹頭的樹可沒少。
記者：潘紫芳
攝影：潘紫芳、劉永發
蘇民峰：攬住車胎跳落避風塘！
人人都知我廿年前喺廟街擺檔睇相，其實我細個已經成日去京士柏玩，咩話，嗰度點會係何文田呀，嗱，睇地圖，油麻地嚟㗎！嗰時遊樂場真係有森林比你捐，執果實當玩具，點似家將樹鏟平晒。榕樹頭對出就係海，攬住車胎跳落避風塘就學游水！講番廟街，以前好玩得多，有齊嫖賭飲吹，榕樹頭近馬路嗰邊，入夜有專車送人去九龍城寨睇鹹片，當時話「天下三大窮，華燈初上砵察砵，橫床直竹學追龍，排九桌上稱英雄」，講起嚟逢吸毒、賭徒都唔使睇風水，人生注定玩完！講到最愛就係食，以前廟街大道全係食檔，炸大腸、蠔餅、雞粥，不過近年食檔唔係入地舖就執晒，風味唔同，睇，政府連自己特色都維持唔到！早十年仲會去廟街巡吓場，觀察人哋點睇風水，家無啦，畢竟出入唔太方便。
社運人士陳可樂：小販都有百寶袋㗎！
搞社運令我認識油麻地，仲搬埋入嚟住，我眼中，油麻地係個落街行幾步就可以滿足衣食住行嘅社區，同街坊傾吓偈，陽光下睇人曬吓衫，感覺有好多人同你分享當下，分享生活空間。或者外來人認為呢區好雜，其實一個城市太乾淨先係病態，會令人窒息。呢區啲菜販都好似有個叮噹百寶袋，總有驚喜畀你，你以為佢賣菜咩，突然又會有肉賣，仲教埋你點煮，話你知今日咩菜最靚。嗰陣未搬嚟，同菜販提起租唔到地方住，菜販話：「早知買個單位租畀你」嗰份人情味好特別。仲有，入夜之後，其實有啲路無車行，我試過喺路中心開枱打邊爐㖭！
Vangi@活化廳：呢啲就係街坊街里！
自從加入活化廳（藝術組織），我認為自己係半個街坊，除咗工作，仲喺附近租Studio，因而結識鄰里，仲教我種菜。入夜，街坊會將呢度當屋企，拎唱片嚟分享，令我明白何謂「街坊街里」。
尹光：一首歌賺三萬
大家都誤會我廟街出身，其實係我嘅唱片喺廟街大行其道，檔檔都播我嘅卡式帶，先有「廟街王子」呢個美譽。不過我都經常出沒油麻地，因為好多老友住呢區。70年代，茶座淨係唱粵語，近年就多咗國內人嚟搵食，國語、家鄉話都照唱，不過賺到嘅錢少得多。97年，試過有茶座姐仔唱一首歌，15分鐘已賺到三萬蚊，家唱一首先得廿皮。
Perry@家品店Modern：呢個地方好神奇！
阿爺喺呢區開機舖，未夠16歲就同阿哥落舖打機！我眼中，油麻地無生氣，賣啲嘢一式一樣，所以我喺廟街開舖，想加入唔同元素。剛開舖，街坊偷望咗幾日先敢入嚟睇吓我賣乜，最記得有次和尚、修女同時喺舖入面，嗰刻覺得油麻地係個好神奇嘅地方。
