隔牆有耳:一人撐五名單 阿富萬能key - 李八方

隔牆有耳:一人撐五名單 阿富萬能key - 李八方

鄭家富退出民主黨後,今年退下火線,由參選變助選,不過佢好博愛,總共支持咗新界東五張泛民名單。阿富咁濫,被網民譏笑係「萬能key」,話只要候選人冇投票支持政改,都可以獲阿富嘅「全力支持」。
阿富上屆獲得四萬票當選,呢啲票數引起各泛民黨派垂涎,因為舐到一半已經幾乎夠贏。據聞阿富最初只答應支持工黨張超雄,同新民主同盟范國威兩張名單,但近日阿富越來越濫,連同區其他泛民名單,包括公民黨湯家驊、社民連長毛、人民力量陳志全統統都獲阿富「全力支持」,咁佢其實真正「全力支持」邊個呢?相信係一個謎。
唔止新東,阿富仲撈過界,連九龍東嘅社民連陶君行、港島陳家洛、何秀蘭、新界西李卓人都獲阿富「全力支持」,難怪有網民譏諷阿富係政壇萬能key,總之冇支持政改就啱key,十足十萬能插蘇咁來者不拒。

撐完社民連,阿富又撐狂插白鴿黨嘅人民力量。

湯家驊唔支持五區公投,阿富都「全力支持」,認真濫。

阿富交波畀范國威,但係呢場係桌球賽,成枱都係波,人人有份。

新民主同盟憂打亂部署

有網民笑言阿富將支持候選人呢樣嘢,當做證婚人接job咁接,總之就多啲嚟密啲手;但阿富今次咁博愛,卻令新民主同盟唔太高興,認為阿富咁做打亂部署。一直以為可接阿富棒嘅范國威,今年率領新民主同盟出選,打正旗號係接阿富波,名單候選人之一任啟邦話,一向支持阿富嘅街坊家下都唔知投票畀邊個好,究竟投畀范國威好,定係投畀阿富同樣支持嘅湯家驊、張超雄同慢必好呢?仲話范國威喺阿富咁樣「分薄票源」下,隨時墮馬。

mailto:[email protected]

阿富喺報紙廣告度力撐以前同係民主黨「少壯派」嘅陶君行。