法拉利一直都不乏被Fans熱捧嘅周邊產品,今次輪到首獲Ferrari授權嘅耳筒,兩大系列造型一剛一柔,配上躍馬廠標、專用紅色同碳纖元素,車壇鐵漢形像鮮明,而採用座椅相同嘅羊仔皮及耳罩設計,軟熟舒適得令人驚覺佢柔情嘅一面。
記者:韓繼聰
攝影:伍慶泉
模特兒:Tina
華麗美學 舒服為主
今次嘅法拉利耳筒系列,分為兩種風格各異嘅Collection,好似呢款Cavallino系列,以F50、458Italia、Enzo等型到無譜嘅超跑為題材設計。無論物料同質感,均充滿法拉利華麗美學感覺。系列中嘅T250,啡、銀、黑三色配襯,感覺高雅,金屬位經精心打磨,啡色皮革部份更仿照法拉利座椅物料,以柔軟羊皮人手編織製作,相當矜貴,戴上去感覺亦軟熟舒服。音色方面,Cavallino同樣以舒適為主導,配有40mm單元,無特別強調低音勁度,聲音表現偏向平衡,細緻清脆,空間感不俗,欣賞人聲、古典、Jazz特別有韻味。
F1上身 低音顯力量
另一系列Scuderia,則是以法拉利F1車隊作靈感,設計上以F1烈火砌車味為主,DieHardFans必愛。其中P200算係代表作,造型跟賽車場上工作人員戴嘅耳筒如出一轍,耳筒臂位設計與別不同,加上霸氣Size及碳纖紋,戴出街一定相當注目。
聲音表現方面,P200擁有系列中最大嘅50mm單元,配合特有H.A.S(HighAudio-Scene)技術,提供強勁嘅3D音效及特強重低音,力量表現就如F1引擎般澎湃!絕對適合聽BandSound同HipPop等多低頻嘅音樂。嫌P200火紅上身太刺眼,另一款R200亦係唔錯選擇,耳罩上嘅「散熱位」完全依照法拉利菱形氣孔獨有設計,甚具賽車風格。
同場加映:的骰拉利