對圈內人嚟講，英超係一個尋金夢，不過開季只一個禮拜，其實個泡沫無謂吹到咁大，實事求是，降低期望，或能有意外驚喜；今周小弟睇好熱刺同修咸頓，主理人低調，主場可開齋。
上周賽後筆記，已點題敗走紐記嘅熱刺值得跟進，雖然見到禮拜四晚，正牌莊家開盤，眉頭即皺，主W鬥西布朗得1.37倍；但對手西布朗上仗大炒利記，表現唔算巴閉，上半場靠一個世界波，下半場對手踢少個入多兩粒。不過堅持熱亦要熱刺嘅原因係，洗盡鉛華、被車仔大佬玩殘嘅少帥波亞斯，似能踏實去面對另一次英超挑戰。
英超呢個金礦，喺經濟低迷下更突顯霸氣，據網站soccernet評論報道，英國本土嘅電視直播費由明夏起，再提高70%，球會在這方面收入勢進一步上升；不過熱刺唔係車仔，波帥能喺英超重生，唔止冇亂使錢，仲膽大到呢個禮拜放走兩個中堅巴桑同隊長戴臣，再加中場侯度史東，現時主力人腳其實應不足以應付全季比賽，小弟喺佢哋未補貨前，亦唔太睇好佢哋長線成績。不過純計今場勝負機會，只要中場一眾小將進一步上力，能不惜氣力全力掃蕩，配合重投嘅艾迪巴約，搭加里夫巴利及基菲爾施古臣呢個進攻鐵三角夠威力，單W冇肉食，博[-1]。
仲有一個膽大嘅領隊，係修咸頓嘅書生領隊艾堅斯，當年喺斯肯索普長期擔任物理治療師，相信訓練到佢嘅驚人耐性；上仗作客曼城，淡淡定定，先收起最勁嗰兩位主力，實事求是，喺下半場一入場兩射手即各入一粒，雖敗但表現拍爛手掌。今次返主場，鬥小弟認為首周表現極差兼剛走快翼域陀摩西斯嘅韋根，艾堅斯仲唔畀小弟睇吓佢底牌？
（下次見報：01/09）
蘋果波神
周末精選
-正-
修咸頓勝
-副-
熱刺勝[-1]
-冷-
修咸頓勝[-1]