昨日講過沙田第一城啲大小住宅單位有一個特點，就係廚房偏細，只合嬌小女士入內煮餸，大肥佬梁文韜之流，根本行入去都有困難。
講起肥佬韜，竟然就在沙田馬會凱旋廳撞到佢，此日在凱旋廳飲茶，侍應過嚟細細聲講：「梁文韜先生請你過去傾吓。」哦，原來韜哥與三位同事與凱旋廳大廚楊先生在另一邊密斟，叫左丁山過去做乜？韜哥話：「乜咁耐未見過你呀？我晚晚在灣仔噃！」當然知啦，佢家坐鎮灣仔史釗域道大榮華，此店中午時份插針不入，晚飯時間日日爆滿，左丁山費事去同人逼啦。雖然唔去幫襯，但韜哥在「爽報」寫飲食，一定追睇，有嘢學吖嘛！學乜嘢？等韜哥講：「肥佬黎捉我寫飲食專欄，要與別不同，一定要介紹食物之源流，唔淨止係介紹菜式咁簡單，譬如寫客家菜，就要講埋少少歷史。」咪係囉，左丁山就係要學呢啲，吸收之後，可以同人講幾句，以示有飲食文化吖嘛。
食客家菜，冇乜地方可揀，泉章居已算最出名。凱旋廳呢幾日有客家菜推介，楊大廚話自內地來港之客家菜名廚與凱旋廳合作炮製傳統客家菜，保證原汁原味咁話，咁樣，有冇辦法同肥佬韜合作呀，韜哥即刻講：「嗱，你訂定枱捧場嘞，十月十二日，我地在凱旋廳貢獻圍村菜（即大榮華招牌貨），由元朗方面直接來土貨（例如烏頭），馬會自己買其他材料，譬如一味蟹肉炒長軟，馬會會供應新鮮蟹肉，絕非雪藏品質，餘此類推……」將大榮華菜式，推去凱旋廳，用馬會貨源，真係幾好噃，只不過豬油頭抽撈飯呢味，相信要大榮華直接供應先至得。
楊大廚與韜哥傾炮製圍村菜細節，例如點樣引入白酒、紅酒，邊隻品種可以配合圍村菜味道等等。左丁山無謂阻住人地搞正經事，立即告退，望吓韜哥腰圍，怕有五十吋啩？呢排睇埋啲BMI數字報道，男人腰圍超過32吋就要關注，不禁為佢擔心，但佢又感覺好舒服，對大肚腩不當作一回事，相信佢嘅家庭醫生都勸佢唔掂。又唔通日日食丹參田七粉，化解膽固醇？相信以佢對中國食療知識之廣，一定有個人秘方嘅！