陽光妹何思諺（Leanne）20歲未婚懷孕，經手人是樂隊Mr.鼓手杜志烜（Tom）。似乎所有未婚懷孕的故事，都是一樣。Leanne月經遲遲未到，還以為是賀爾蒙分泌失調，當醫生告知體內有一粒生命體，她呆了，眼淚奪眶而出，外面突然天陰下雨，十足拍戲一樣。Leanne和Tom最後選擇結婚、生仔，組織一個溫暖幸福的家給兒子杜杜。Leanne在一年之內，經歷人生三個重要的階段，懷孕、結婚、生仔，每一刻都被攝影師好友Dan記錄下來，如今結集成書推出，跟大家分享她的愛和幸福。 撰文：楊潔雯
愛和幸福是要爭取的，在Leanne的故事入面，她跟Tom相識不久，已私訂終身，意外懷孕，令他們陣腳大亂，Leanne說：「當時知道有BB，佢（Tom）話我哋一定要BB，我哋一齊幾個月，不過我哋已經決定會喺三年後結婚，當時係想等Mr.穩定啲，發生呢個意外，好彩得到公司同屋企人支持。」
Leanne和Tom年紀輕輕未婚懷孕，必須面對社會、輿論和生活的壓力，只有愛可令他們排除萬難，共同度過，Leanne說：「我哋兩個係清楚大家好愛對方，當知道有BB，覺得係上天畀我哋嘅禮物。」
怕粉絲有樣學樣
身為公眾人物，Leanne和Tom最擔心的是心智未成熟的粉絲們，在未有愛的基礎下，效法他們的做法，果然Leanne已為人母，多了一份社會責任，她說：「我一直都喺度講，我唔希望粉絲，尤其係年紀輕嘅粉絲，會話Leanne同Tom有BB，我都想整番個。我覺得既然我同Tom有咗，係生命唔可以放棄，同埋有屋企人支持，所以選擇繼續做，希望粉絲要諗清楚先去做，今日我冇後悔，好彩嘅係我哋揀啱對方先去做。」做了媽媽，真的長大了。
21歲湊半歲B
20歲懷孕，即刻結婚，21歲產子，兒子杜杜現在六個月大。在應該是享受青春的時候，Leanne卻做了很多少女不會做的事，她應該會有少少可惜，她說：「之前錄影節目，我坐定定講嘢，隔籬就係錄緊《Y2K》，我聽到成班人喺度yeah，唉！佢哋真係好青春，我之後嘆氣，轉頭就拎個電話出嚟睇BB相，以前我實好似佢哋咁yeah，嗰刻都有少少黯然。」
結婚生仔，給人感覺更成熟穩重，Leanne不再是陽光女孩，她說：「已經唔係陽光檸檬茶，一年之間變到好成熟，陀BB嗰陣都擔心自己事業，好彩好多人畀機會我，電視台搵我拍劇，不過家我拍劇係做個24歲結婚有BB嘅年輕媽媽。」或許她今日應該慶幸不再是模特兒，否則她可能要做模，Leanne笑說：「可能係，不過我都冇嘢可以露，既然去到人生另一階段，我會再搵喜歡嘅嘢做。」
難忘陣痛十幾粒鐘
Leanne在一年內經歷人生三個重要階段，她的好友攝影師周細球（Dan），以追蹤攝影模式，拍下懷孕、結婚、生仔整個過程，記錄她每一個重要、溫馨、無奈的時刻，Leanne說：「除粉絲外，我希望多啲年輕媽媽同鍾意攝影嘅人買，可以畀佢哋參考。」
素顏抱B留影
在《Lifeinayear》相集，以圖片記錄Leanne懷孕期間的變化，透過圖片感受他們的愛和幸福，她說：「我呢個朋友真係好好，送呢份禮物畀我，用菲林影，仲曬咗超過5,000張相，我可以見到自己另一面，好似有張相我抱住BB，我睇番先知自己抱B個樣係咁。仲有一幅我最鍾意嘅係喺醫院影，我生完BB坐喺床度，前面係阿Tom，我個樣好攰，見到張相，我仲會諗起痛咗十幾個鐘嗰種痛，雖然冇化妝個樣又攰，但我好鍾意呢張相。」