我主場：第101個叮噹

唱作人陳奐仁（Hanjin）常掛着開心笑容的圓臉，正是可愛卡通人物多啦A夢（前稱叮噹）的倒模，近日尖沙嘴擺出100個多啦A夢公仔陣。Hanjin日前踩場會他的「巴打」，他一入場即可魚目混珠，現場參觀的巿民都爭相與第101個叮噹合照。　撰文：比華利

現年36歲的陳奐仁，其面孔和身形均有多啦A夢影子，他日前微服出巡，穿上淺色格仔上衣配長褲往尖沙嘴海港城露天廣場的多啦A夢展覽。看到眾兄弟列陣歡迎，Hanjin十分雀躍，企圖逐一跟「巴打」合照。Hanjin一出現即被巿民認出，大人細路爭相邀請他合照，有人更指Hanjin像多啦A夢，他大方回應：「我唔介意，咁我要多謝阿爸阿媽。」Hanjin會完100位兄弟即興奮地說：「好開心，睇到我眼花繚亂。」
Hanjin與多啦A夢結緣於4歲，他說：「當年我收到一個多啦A夢枕頭，從此我就鍾意咗佢，佢係我嘅BB，我經常會同佢瞓，多啦A夢陪住我一齊成長。佢成日都有好多法寶，畀咗童年嘅我好多美好嘅幻想，我好希望每個小朋友最少都有過一次幻想。」

受訪當天，陳奐仁透過多啦A夢其中一件法寶隨意門看到人生百態。

陳奐仁曾想過讀心理學，但由於修讀這科需時，他最後打消了念頭。

愛發白日夢

Hanjin回憶童年幻想無邊無際，他說：「真係一大堆，直到家我承認自己都鍾意發白日夢，我亂諗啲無謂嘢會為我減壓。」Hanjin更自爆兒時幻想：「我細個會幻想自己係大俠，平日化身人類生存，當地球受襲，我就回復真身，我係一股能量，可以去妖除魔。」明顯這個想法幼稚無倫，長大了一點，Hanjin的幻想變得較實際，他續說：「到咗大啲年紀，我又會幻想自己係一個心理醫生，因為可以幫助人哋解決心理難關。想當年我有諗過去讀呢科，但知道要進修7年，畢業後又要實習，計計埋埋咪成30幾歲人先做嘢，結果打消念頭。」

陳奐仁似足多啦A夢，連小朋友也很喜歡他。

明知冇法寶

Hanjin指兒時沒幻想過借多啦A夢的法寶讓夢想成真，他認真說：「雖然明知佢有好多法寶，但又冇諗過要好似大雄咁利用佢，我只當多啦A夢係朋友。」難道Hanjin從不為多啦A夢經典法寶記憶麪包動搖，想當年考試苦讀時，沒想過利用記憶麪包印在書本上，然後吃下便把書本內容牢牢記住，Hanjin笑說：「我同細佬明知世間冇記憶麪包，但就從漫畫中無聊諗到將本書撕爛，然後加水煲成湯飲，咁效果咪一樣。」結果這個儍儍的念頭最終沒有實現，Hanjin兩兄弟臨崖勒馬的關鍵是怕一旦把課本撕爛後果堪虞，Hanjin說：「諗到本書爛咗後果幾咁嚴重，當然唔敢行動啦。」
髮型：DereckofXenterHairSalon
服裝：DivisionOne

追求簡單快樂

「快樂其實可以好簡單」是陳奐仁的口頭禪，正好跟《多啦A夢》主題曲的歌詞「人人期望可達到，我的快樂比天高」脗合。對於快樂，Hanjin有一套見解，他表示曾看過一些美國的報告，他的快樂論有三個層次，Hanjin說：「第一種係刺激性，每當我哋首次試新嘢會特別開心同興奮；第二種係當一個人全情投入喺一件事情上；第三種係幫助到別人就會快樂，呢種快樂最純潔。」