行業一節淡三墟，但樓市卻連升將近十年，升勢未止，這拜前朝和現屆主理房屋的官員所賜。
新班子上場 樓市更熱
前朝由煲呔曾為特首時，碰上沙士期由經濟谷底反彈，享受了七年豐收期，以為制訂勾地表和停售居屋政策等為德政，自視過高，令10萬名負資產人士成功脫險，失業率由高峯期8.5%急速回落至3%，殊不知過度干預樓市，抑壓供應但需求澎湃回歸，尤其是在2007年當大家已開始提醒住宅復升之時，居然不理民間聲音沒有改變房屋政策，失去壓市先機。
原本諗住2008年金融海嘯殺到可為樓市降溫，殊不知內地推行四萬億救市，大放水喉使到內地人來港炒股炒樓，樓價不消半年便收復三成樓價失地，更再上一層樓四連升，四年來合共升了五成，當年九龍站豪宅由低至每方呎8000元更升了近一倍，升幅驚人。
新特首梁振英班子更火上加油，上任後齋講不會推冧樓價，同時推5000「白表免補價」名額，推高低下層買家的居屋價，單是居屋價已升了超過一成以上。運輸及房屋局局長張炳良接了「命令」，快將向置安心開刀，不排除由先租後買改為只買不租，無計可施，呢啲局長請佢返嚟做乜，一個多月來照抄舊橋或左改右改，毫無建樹可言。
老樓絕不懷疑張局長學識，但讀書人點樣將理論化為實踐，你每月收20多萬元人工，呢兩個月白收人工，20萬可以請到20個大學生，製造20個就業機會，你呢班局長枉花納稅人錢，只說不做，開咪講兩句話政府密切留意樓市，仲差過當年林公公人肉錄音機嗰陣。老樓對於這類懶人局長極之不滿，作為父母官隱世大埔相連戶，得把口冇政績，難服眾。
劉兆昌
資深地產傳媒人
http://www.HKLau.com