香港人成日怨樓價貴到嘔，對合約億億聲嘅美籍華裔NBA球星林書豪嚟講，喺香港買個豪宅單位投資就濕濕碎。今日會喺尖沙嘴K11商場現身嘅佢，噚晚就去咗名鑄66樓睇示範單位，莫非林瘋想趁24歲生日入市，買份大禮畀自己，定係邀請佢嚟嘅地產商借勢宣傳先？
睇名鑄66樓示範單位
噚日24歲牛一嘅林瘋，一大朝早就離開尖沙嘴酒店，直至下午先閃閃縮縮咁，經秘密通道返上酒店房；經理人代表之後話佢去咗九龍區嘅籃球場練習，但就唔肯詳細講練咗幾耐。不過，有知情人士向我求大俠爆料，話林瘋其實去睇樓至真。而到夜晚再收到風，話原來林瘋夜晚去咗灣仔食鐵板燒，之後就上名鑄66樓睇示範單位。
今次林書豪同佢屋企人訪問香港，就係由地產商新世界出錢請嘅，入住嘅酒店又係新世界出錢發展，所以今次林瘋參觀名鑄，或者係地產商借佢過橋宣傳都未定。個盤賣幾萬蚊一呎；而林瘋參觀嘅66樓更加全部係複式，最大單位有成5,260呎；上個月低幾層嘅單位，成交價都成2.2億港元。
不過「林瘋」上個月由紐約人過檔火箭，3年新約有成2,510萬美元（約1.95億港元），加埋天價嘅贊助同廣告費，絕對買得起。到時間屋咁大，請番舊隊友費特斯嚟香港玩，就唔使佢瞓梳化啦！
出街食飯口黑面黑
話時話，新世界都唔止搵林瘋做生招牌，噚日仲送咗個巨型籃球生日蛋糕畀佢，賀佢24歲生日。今日下晝林瘋就會去新世界旗下嘅K11商場出席公開活動，禮拜日就會到機場博覽館，參加基督教佈道會。可能早前去大陸同台灣，粉絲反應好熱烈，但噚日酒店樓下fans影都冇，難怪佢出街食晚飯嗰陣，頭耷耷兼口黑面黑，又唔肯答問題，佢家人仲同隨行職員阻住記者影相，搞到香港傳媒對佢嘅印象分差晒。