揸靚車唔係大晒，英超球星亦唔係橫行無忌，好似阿仙奴巴西左閘安德里山度士咁，冇正選仲唔勤加訓練，仲日光日白揸住自己價值11萬鎊（約134萬港元）嘅超跑馬沙拉蒂，公然同警方上演一場「極速飄移大追捕」，結果梗係冇好下場，若危險駕駛罪名一旦成立，分分鐘要坐兩年監。
罪成最高囚兩年
原本穩坐正選嘅安德里山度士，上季季中傷咗就開始失去領隊雲格歡心，可能山度士坐冷板坐到痴咗條筋，喺英超開鑼戰對新特蘭前一日嘅朝早，喺去緊阿仙奴訓練基地操練時，竟然喺鬧市以時速209公里飛馳。據講當時警方發現山度士架車超速超到離譜，即時上前截停佢，點知山度士竟然再踩油想撇甩警察；話晒係超跑，英國警方幾經辛苦，先喺離阿仙奴訓練基地約1公里嘅地方截停呢位巴西球星。
據目擊者透露，當時有兩、三名警員落車向佢問話，仲發埋告票，控告佢危險駕駛。呢位29歲球星下個月將要上庭接受聆訊，一旦罪名成立，最高刑罰可能係入獄兩年。
其實以前都發生過好多球星超速駕駛或醉駕被補嘅案例（見附表），但最後大部份都係罰款或停牌就冇事，山度士單案好可能都係同之前嗰幾單差唔多。不過，我求大俠就呼籲法院真係應該揸正嚟做，殺一儆百都好，唔係呢班體育明星真係以為無法無天，想點都得。
老實講，山度士家喺阿仙奴踢唔到正選，就應好好操番弗自己啲狀態，基蘭基比斯亦唔係勁得咁交關，只要喺操練中有表現，實有機會再獲領隊重用；家咁搞法，以雲格呢啲咁重紀律嘅領隊，連桑治都因為懶到出汁被踢走，對山度士又點會手下留情吖！
球星涉危險駕駛事件簿
時間：04/12 涉案球星：派拿
事發簡述：派拿因11天內兩度危險駕駛被檢控，其後更缺席聆訊要法庭出動拘捕令，最終僅被輕判罰款1,000鎊及駕駛執照被扣7分。
時間：11/10 涉案球星：泰維斯
事發簡述：泰維斯在曼徹斯特高速駕駛遭檢控，後來又不回覆法庭的檢控，最終僅罰款60鎊及被扣3分。
時間：01/09 涉案球星：基斯坦奴朗拿度
事發簡述：C朗仍效力曼聯時，涉嫌在隧道內超速駕駛，最終撞向路邊保護欄，其法拉利跑車亦嚴重損毀，惟法庭因證據不足，沒有興訟。