無綫上位花旦苟芸慧近日緋聞纏身，緋聞男友越傳越多，近日有報道指她與已婚的謝天華玩車震，前晚苟芸慧出席《飛虎》慶功宴，提到車震時即委屈得熱淚盈眶，最慘連雙親都信以為真，以為愛女亂搞男女關係。
現年29歲的苟芸慧被無綫力捧，一劇接一劇，其緋聞也接踵而來，先後傳出嗲暈視帝鄭嘉穎、小生陳豪、曹永廉、蕭正楠和梁烈唯等，地位直逼「姣佘」佘詩曼。日前有報道指她與已婚的謝天華車震，雙親信以為真，但事實上兩人只是在拍攝新劇《法網狙擊》。
「佢哋開始唔信我」
緋聞成尺厚的苟芸慧前晚與《飛虎》演員到電視城出席行政主席梁乃鵬宴請的慶功宴，當提到車震兩字時，苟芸慧即忍不住委屈落淚，更越說越激動，狂滴眼淚說：「真係好委屈，多謝大家關心，明白為咗工作先咁寫，人有底線，唔好傷害屋企人，真係好無辜，自己為咗工作，搞到家人好唔開心，我都覺得好辛苦，我唔係在乎點睇我，我接受唔到父母唔開心。」
苟芸慧直言為了今次事件要向父母解釋，身在加拿大的父母更打長途電話質問女兒發生甚麼事，她無奈說：「擔心我好正常，一單接一單負面新聞，佢哋唔明白呢個圈，咁多單嘢，佢哋開始唔信我，所以我覺得好傷心，我冇亂搞男女關係，不過家呢個level唔係我走唔做就可以解決，反而要勇敢面對呢個話題，畀父母返嚟住，等佢哋明白我工作性質。」她表示因仍要拍劇，未能請假，但她強調自己專業，會將情緒和工作分開。
向梁烈唯派檸檬
《飛》劇中飾演苟芸慧男友的梁烈唯，在監製要求下遞水和紙巾，但為免再傳緋聞，苟芸慧即大派檸檬說：「你過嚟好麻煩，走吧。我以前鬼妹仔性格，家公眾人物要避忌，希望大家體諒，拍劇冇得避，當日車震係劇情需要，監製有講要身體接觸，話我要引誘對方，其實係整蠱天華，都有其他演員，我都唔知乜嘢係車震，係媽咪鬧我先知車震係乜，總之拍時都冇車震。」
同場的宣萱被問到《飛》劇是否開續集，她略帶微言說：「唔知，之前有提過，但聽聞嚟緊半年已經排好晒劇集，如果係，相信係半年後嘅事，我覺得劇集咁深入民心要食住條水，不過做演員好被動，初頭以為得十幾點收視，但竟然有黃金時段收視，係我離開TVB前一個好滿意嘅作品，對自己係個好好交代。」
採訪：楊潔雯 攝影：陳順禎