文憑試考生入大學名單，在八月十七日揭曉，因為係香港教育試上第一次，學生與家長都十分緊張，考到七科5星嘅狀元當然唔計。學生豪之成績，以前講過，今趟能否步阿哥後塵，成為中大生呢，左丁山戥佢緊張埋一份，卒之在早上九時過後，收到短訊，學生豪得中文大學取錄讀第二志願，即係中大工程學院。入唔到第一志願中大理學院，學生豪未免略感失望，不過好快就去咗同同學打機慶祝，事關佢同班三十七人有八位老友入到中大，九位入港大及科大，其中一位成績比佢更好嘅都係入唔到理學院而入咗工程學院，又有一位入中大醫學院。冇計啦，學生豪話入到中大，海濶天空，以後四年有大把options（選項），諗吓都開心！
既然如此，唔駛代佢擔心，中午就在陸羽飲茶咯。中國會計專家黃炘強知道左丁山必有此行，提早走上去等，大家不見面已久，講完幾句問候說話，黃炘強就話：「嗱，我本舊作《中國稅務技巧》出咗最新增訂版，總第八版，特登嚟飲茶，親自送一本精裝本俾你，還有一本中國會計管理手冊，請指教指教！」
邊度識指教呀？黃炘強出版有關中國會計、稅務嘅書，多到數唔晒，問佢有幾多本，佢話：「1979年出版《會計核算起源和發展初步探討》，至到今年，好似有二十八本啩，最暢銷嘅係2001年嘅《中國稅務安排技巧》，出過七版，今年七月出增訂版，即係第八版。」寫關於中國會計稅務審計嘅書，有二十八本咁多，想唔話佢係中國會計專家都唔得，既然係咁經驗豐富，中大校外進修學院年年搵佢開科講授中國會計，中國稅務，不少本地資深會計師都係佢學生，特登報名讀佢嘅課程，學習中國會計實務。
別人寫會計稅務書，多數悶到飛起，難啃到極，對會計無認識者，避之則吉。黃炘強就唔同，佢曾經參加過香港文學獎比賽，得一位評審委員岑逸飛賞識，推薦俾《壹週刊》做寫手，你知啦，文章寫得悶，好難在壹仔立足嘅啫！後來黃炘強又去過報紙寫人物採訪，廣告特刊，財經專欄，為名人撰寫演講詞，正一係寫作多面手，故此佢寫中國稅務安排技巧，生動到極，能夠吸引讀者，出到第八版！