自從買咗Xbox部Kinect返屋企，每晚手舞足蹈玩到嘩鬼叫！勢估唔到DC也「Kinect化」，三星最新MV900F，除咗180oFlip芒自拍，更搞鬼到加入體感遙控功能，15呎內向佢揮手、轉圈，就可控制變焦同快門，連時間掣都慳番！
記者：陳國輝
攝影：林栢鈞
模特兒：Clarisse@Zmodel
打圈變焦 15呎都Work
聽到DC亦仿效Kinect玩法，莫非要全身擺動兼跳跳紮咁玩？實情又無咁誇張！驟眼睇，MV900F只係一部普通卡片相機，厚17.2mm及重132g，內置咗一個動作感應器，你只要單手擺出順時針轉圈動作，相機鏡頭會自動ZoomIn，相反，逆時針轉圈，佢就會ZoomOut；另外，還可上下揮手，命令相機即Shoot，非常方便。一班人影大合照，根本唔使搵人幫，自己都搞得掂。
其實Samsung曾推出過一款將智能手機當成Remote嘅DC，可做出隔空變焦、拍攝等動作，但由於反應慢，加上Wi-Fi又經常斷線，未能成大器。今次MV900F表現好得多，順時針轉圈嗰陣，雖然鏡頭逐啲逐啲伸出嚟，但明顯動作順滑，而且反應超快；另外，相機喺拍攝前會畀三秒你擺好Pose準備，認真體貼！要留意係，當日我哋用盡15呎室內空間試玩，感應出乎意料地準確，太近佢反而未必感應到。
變Poster女主角勁搞鬼
體積細細，玩味濃厚，呢部機仔擺明主攻潮仔潮女，而非專業DC！除咗玩體感，MV900F仲提供女性至Like嘅美白Filter，只要先影一幅相，便可進入美白介面，慢慢試吓十幾種不同效果，例如「絲滑」、「自然」我勉強聯想得到，但何謂「天真」、「可愛」效果，咁就要你親身試過先清楚喇！至於其他特殊效果，值得留意係背景相框，將你靚樣Key落外國車站嘅海報度，又幾好玩喎！
