去咗上海四年幾幫朱玲玲老公羅康瑞間瑞安公司打工嘅向海嵐（Anne），聽聞佢最近辭咗職，馮仁昭噚日打電話同仲喺上海返緊工嘅Anne通過電話，傾吓佢嚟緊有乜新動向。
兼顧搞生意
Anne話佢呢幾年學到好多嘢，好多謝老闆同老闆娘，不過好想有自己嘅事業，所以佢會同香港一個朋友搞公司，專幫內地客出海外搞婚禮，投資成六位數字。佢仲話會簽番個經理人拍番劇集㖭，老闆娘朱玲玲都好支持佢呢個決定。
其實Anne之前演嘅無綫劇《楊貴妃》同《無頭東宮》喺內地都幾受落，呢兩年都不停有人搵佢拍劇或者演舞台劇，拍戲都係佢嘅興趣，於是決定同盤生意一齊，雙線發展自己嘅事業，佢話經理人幫佢傾緊工作，預計年底會拍劇，不過基地以內地為主，咁仲會唔會返香港拍劇呢？Anne話以前同陳妙瑛、黎姿、黎耀祥佢哋合作得好開心，都好想有機會再合作。