賈曉晨（JJ）飛甩沈震軒後，馬上被爆搭上打星樊少皇，「晨皇戀」曝光，男方就被揭有結婚20年糟糠妻同埋有15歲嘅大女同10歲嘅囝囝。JJ今年3月喺洪天明婚宴邂逅樊少皇後，好快打得火熱，有指JJ呢排仲自費買機票去內地探樊少皇班，上星期又拍拖去青島預支蜜月，仲分別上載酒店房嘅相去微博。近日樊太殺出，小三JJ現形，樊少皇原來一直講大話隱瞞人夫身份。
晨皇戀拍拖一個月
樊少皇噚日透過經理人直認晨皇戀，佢話二人拍拖約一個月，仲澄清JJ唔係第三者，樊少皇話同前妻已冇感情：「我們當初感情幼稚，甚至沒有選擇結婚，在一起生活後，生了兩個孩子。」樊少皇近年北上賺人仔，夫妻聚少離多：「大約四年前，我向她提出了分手，懇請她也同樣放開這段已經互相折磨，已經不可能扭轉的關係，也承諾會一如既往的愛護孩子，也始終會把每部戲大部份的片酬都交給他們使用。」
JJ噚日接受無綫娛樂新聞台電話訪問，澄清唔係小三，仲喊住話：「未揭發樊少皇有太太前，我有諗同佢認真發展，但件事曝光後我接受唔到，我知嘅嘢唔會比雜誌多，好想等件事搞清楚。」JJ避談青島酒店同房，問佢家乜嘢情況，佢話：「仲有聯絡，我等佢啲嘢搞清楚先接受到。」