集NBA總冠軍、MVP同奧運金牌於一身嘅熱火球星勒邦占士，噚日由北京移師上海，出席一連4日嘅Nike運動匯，所到之處吸引數以千計fans瘋狂死跟，場面墟冚，搶盡同場球星易建聯等嘅風頭！
運動匯噚日喺上海體育館開鑼，我求大俠有幸連續兩年見證呢項盛事；效力溜馬嘅保羅佐治、灰熊嘅基爾同埋自由身嘅易建聯，噚日先後登場，大玩crossover試打棒球、打高爾夫球等，本已引嚟一班「粉絲」追隨。但要數最震撼，依然係壓軸下晝4點半先蒲頭嘅大帝。
呢位金牌風頭躉，未落車已經有成千名球迷守候，隨住「MVP！MVP！」嘅叫聲陪伴大帝落車後，擁躉更加瘋狂，現場幾十名保安組成嘅人鏈都幾乎頂唔住人潮，場面極之混亂。好彩大帝只係用咗45分鐘走訪3個景點，玩過美式足球就「閉關」接受傳媒訪問；贏完金牌之後，占士口氣都大啲，完全唔放剛簽入懷特侯活同尼殊嘅湖人喺眼內︰「湖人都好強，但預計來季決賽最大對手都係雷霆，始終佢哋球員年輕，進步得快。」