振英哥上台，推高樓市，啲地產代理開心到飛起，做嘢零舍有心機。沙田陳太賦閒在家，日日收到兩三個地產代理電話，佢最初會問：「你地點知我個電話號碼？」對方支吾以對，跟住就大力推銷「溱岸」、「天賦海灣」，陳太答：「冇錢買！」代理立即改口風：「你住緊嘅單位最近升咗好多噃，有冇意思出售，我手上有客鍾意你地屋苑呀！」如是者一日兩三次，陳太答到冇氣。
星期日卒之有一位相識多年嘅經紀打電話嚟搵佢去睇樓，就在屋苑隔籬座，適合投資收租用，行去唔駛兩分鐘，中層向山有開揚景，千一二呎，碰巧陳太細佬工程師來探訪，於是一齊去睇樓，一睇就嚇咗一跳，假假地係豪宅吖，屋苑環境極佳，設施完善，住客搬遷比率甚低，但呢間屋雖然有菲傭在內，有細路在房間打機，主人不在，細望之下，天花剝落，地板變黑，廁所漏水，廁所廁板有黃漬斑斑，工人廁所內堆滿雜物上天花板，客廳圍牆地腳線剝落，經紀話呢間屋係原來發展商裝修間格，未見郁動過。陳太問：「咁菲傭平時唔抹屋嘅咩？做乜成間屋變成破舊寮屋咁樣？」經紀唯有苦笑，話自己係第一次上嚟睇樓嘅啫，不過素來知道呢個屋苑嘅賣盤不多，故此公司一攞到盤，就立即「明益」沙田陳太喎，點知道豪宅屋苑之內竟有一間爛屋，陳太睇到眼寃。
大家後來講到沙田第一城點解咁搶手，經紀提出一個冇乜人注意嘅問題：「第一城由置富產業信託（778）接手管理商場之後，大肆翻新，商場人流比幾年前多成倍，食肆特多，好好生意，對新興中產增加好大吸引力。你知啦，沙田第一城無論甚麼單位，廚房面積好細，廚神梁文韜相信行唔到入870呎單位嘅廚房！家第一城有好多『模範』（無飯）夫妻，長者又多，佢地少在家煮食，碰啱商場有咁多新型食肆，啱晒啦！778家重施故技，又在銀禧花園商場搞大翻新，不如你地買定銀禧細單位吖，嘻嘻，好彩我老公一早聽到股票阿叔貼士，入咗778嘅股票（其實係基金單位）！」陳太耍手擰頭，自認唔係師奶炒樓兵團，咪搞！陳太話：「梁特首競選時口口聲話要解決香港人住屋問題，點知佢上任後，竟然推高樓價，都唔知點向市民交代，因住佢出辣招打壓挽回面子呀，我容乜易高追坐艇？」經紀猛話唔會，指產業測量師唔會搞喎舊行家衣食，信唔信得過梁特首呀？