詞彙如果有聯繫，則「老母」不曾分離過。惟大美人李嘉欣，演活了母，卻沒有老。今屆港姐玩全民投票直選，若選歷年最愛，美人定必榜上有名。入行24年，四字頭依然大無畏，晉身有B階級卻不減光采，美貌持續跑贏大市。即使大笑，臉上亦不留痕，就算淡掃蛾眉，依然明艷照人，足以輕易KO一眾嫩模，皮膚質素更與15年前拍下的廣告照一樣不變，唔信？以下相片完全不經Photoshop㗎！
撰文：唐美麗
攝影：林栢鈞
我最喜愛的角色：媽媽
小JM正值歲半，嘉欣只間中拍廣告，屋企大晒，不再諗拍戲，09年的《十月圍城》暫是最後之作，「戲唔會接住喇，一來無時間，二來咁多年嚟角色已試過好多，而媽媽這角色只做了一年半，太太都係做咗三年幾，都仲係好新鮮的角色。」訪問時提起兒子便笑不攏嘴，人生走到這階段，她笑言戲裏戲外，也不介意與「媽媽」劃上等號，「我事實上好ProudOf做媽媽，以前覺得好老土，家覺得做媽媽好唔簡單，教佢嘅嘢反而反映自己，佢會Copy你講嘅嘢，所以有特別留意自己言行。」
追女？不會了
徐子淇生夠三個、陳慧琳有「點心」兩味，但嘉欣話一個仔夠晒數，「生女？完全無考慮過，一來無體力，囝囝太鍾意玩，陪佢已花好多精力，加上好自私地想下半生多番啲自由，諗生女？不如諗吓自己仲好啦！」看她日前微博Update：「我期望的是一個美好悠閒的周末，現實是JM發燒久久不降溫，今晚又是無眠的一夜……」又真令人體會佢做人阿媽有幾花心力。
師奶？戒韓劇
說起小JM，嘉欣說他性格似爸爸，「佢好動活潑鍾意四圍爬，通屋跑又唔睇路！」對於兒子的成長與發展，她答得輕鬆，望他順其自然：「我唔想太規限佢，我覺得一個細路的空間好緊要，我會尊重佢本身性格。我唔覺得演奏家不比商人成功，讀到哈佛亦唔代表高人一等，佢唔需要咁，我唔需要限定佢，由佢自由發展。家我都成日控制自己，以免一不小心自己會太緊張。」嘉欣享受湊仔生活，她說：「最花時間喺網上買衫。Relax？都係同佢爸爸研究吓有咩新餐廳……我亦會一路浸浴一路煲韓劇，近排煲緊《市政廳》，朋友介紹我睇，以前從來唔會！」記者取笑她嗜好有「媽媽化」的迹象，她聽到不禁驚叫，「煲韓劇好師奶咩?!哎吔！我要戒喇！我唔想做啲咁俗嘅嘢呀！」全場爆笑，大美人第一次展現最DowntoEarth的一面。
遺傳完美基因
「中葡混血美貌得天獨厚，會考2A7B，88年當選港姐和華姐雙料冠軍，08年嫁入豪門兼一索得子……」這簡介對於尋常人家來說，直如童話人生。對於美貌，良好基因多得媽媽遺傳。嘉欣說媽媽是上海人家，打扮講體面，「佢對外觀好有要求，批評好不留情，細個老工人襯衫，佢見到唔滿意，會話：『着到耕田咁！即刻返屋企換衫。』」對於護膚反卻不考究，「媽媽自己皮膚靚，護理簡單就行，家反而係個女我教佢用Cream、用Mask。」唯一要訣是好好煲營養湯水，「上海人煲湯唔花巧，都係煲吓雞湯，家會擺多啲花膠補充骨膠原，尤其係乾燥的天氣下……又會飲冬蟲草煲湯，一星期飲三四日，又不可日日飲，因為又會有另一個問題出現──會肥！」
抗衰老要提升
產後主要工作拍廣告代言，SHISEIDORevital系列主打抗衰老，這位四十有二的靚媽顯然是最佳代言人。「家忙湊仔，同時少咗時間護膚。我本身屬混合性皮膚，隨着年紀增長皮膚越嚟越乾。」近來忙於四出為品牌出席活動，飛人生活原來也不及湊仔傷皮膚，「對住囝囝，成日皺住眉，又成日大笑，表情豐富咗好多！」對抗乾紋、笑紋，美人心得是盡量按摩，勤力敷Mask，「提升！提升！盡量向上按摩，反地心吸力！」選護膚品亦要針對不同部位對症下藥，「對於我嘅AgeGroup嚟講，緊緻好重要！用咗Revital系列後皮膚回復生氣活力，趕走倦意，且膚色更均勻，尤其Jawline位顯得緊緻有彈力，我特別鍾意有香薰味的護膚品，令皮膚和心情都可放鬆。」
SHISEIDO（28908438）
銅鑼灣白沙道15號