倫敦奧運雖然已經落幕，但賽事片段依然歷歷在目，尤其係體操項目，真係百看不厭。講開體操，國產體育用品股一哥李寧（2331）噚日公佈中期業績，盈利大插水85%，得番4400萬人仔，仲預警全年隨時會見紅，認真嚇死人，之但係李寧業績衰到冇朋友，其實係有迹可尋。
點解咁講？除咗公司一早發盈警外，仲因為揸fit人李寧事先張揚今日會出嚟見記者囉。印象之中，李寧每次出親嚟見傳媒或分析員，都唔慌有好嘢，好似最近嗰次，就係為同佢並肩作戰超過廿年嘅行政總裁張志勇離職解畫，舊年初亦因為定單大倒退消息，要風塵僕僕嚟香港見分析員。
李寧今日主持業績記者會，應該打算派定心丸。佢最好講清楚幾時請番個行政總裁，以後點削減成本、控制存貨等等，否則投資者都好難將一顆躍動的心定下來！