一位署名「家庭主婦」嘅讀者來郵，指業主係要賺到盡，一間住宅劏開三間獨立小房（連細廁所及一個煮食爐），每月租金六千，三間房可收一萬八，但如係一層樓出租，只能收租一萬元。
一萬八千減一萬等於八千，一年多收九萬六千元，就係「投資劏房」所得之額外回報，一層樓劏開三間房，唔計建造成本，劏房內有獨立細廁所，肯定係僭建，有法律風險，既然如此，但事實上仍然有大把人經營劏房，當然唔係為慈善，而係為咗追求額外回報，係一種逐利之市場行為。這種行為是否合法？一講到有僭建，自然不合法，但五十幾年來，為何港英與特區政府都視若無睹，不予取締，一味容忍至今？道理簡單到極，社會上居民有居住需要，一旦取締，會有好多人無瓦遮頭，露宿街頭！
前地政總署署長劉勵超在《信報》專欄（八月十六日）講：
「新政府明言不會採取壓低樓價的政策，傾向增加土地及公私房屋供應，協助中產市民置業和為基層年青市民提供獨立生活空間，這些政策最快也要兩、三年後才能見到成效，在此之前，相信政府也不會貿然大力取締劏房和棺材房，否則只會自編自導一齣趕人落街但又不能提供安置居所，終至逼人上街的民生和政治悲劇。」
呢啲係務實之言，林鄭與張炳良要參考。房屋問題自古已有，於今為烈，唐朝詩聖杜甫就有「安得廣厦千萬間，大庇天下寒士盡歡顏」之嘆，可見千幾年前中國已有房屋不足，或房屋太貴，令寒士難以入住嘅現象。五六十年代香港解決大批木屋區、板間房嘅方法係大量興建公屋，七十年代麥理浩推出「十年建屋」大計，卒之木屋區在香港消失（按：麥理浩建屋大計有其政治計算，源於英倫精心策劃，嶺南大學李彭廣教授新著之「管治香港」，牛津出版社，2012年版對此有揭露。）長期徹底解決劏房之方法，一定係增建公屋，而在解決過程中，劏房不會一夜之間消失。不少人以為住在劏房嘅一定係窮人，其實不一定。最近左丁山認識一位年青專業人士，居於旺角，佢父母在新界有屋，但為咗返工方便，佢寧願在旺角租咗一間劏房，月租八千元，左丁山問佢：「喂，點解唔在沙田租個細單位呀？」佢又答得妙：「住在旺角可以步行返工，一切方便到極，我一個人住劏房完全冇悲情，你唔好誤會呀！」不同人士有不同居住需求，考慮到香港現實環境，一棒打死劏房，只會製造更多麻煩。