興業銀行俾內地股壇長毛衝擊！話說興業銀行最近諗住用50億人仔，喺上海陸家嘴買辦公大樓，基金股東上海寶銀投資董事長崔軍即刻發炮，建議興業用50億做回購仲實際。
崔軍都唔係冇理由，佢指上海樓價十年升咗10至20倍，家陣喺陸家嘴買樓等於高位接貨，萬一樓價暴跌，股東當災，不如將啲錢用嚟回購，股東仲有着數。
崔軍舊年試過寫公開信畀招商銀行（3968）董事長傅玉寧，反對供股，仲建議招行搵畢菲特幫手，不過傅總冇理佢。佢今次嘈興業，應該係希望其他股東遲吓喺股東會投票反對呢單交易。咁識得捍衞股東利益，仲唔係內地版股壇長毛？
唔知作為興業第二大股東嘅恒生（011），聽到呢啲反對聲音有乜投票決定呢？興業就回應話，今次收購對興業資本充足比率只有0.05%影響喎。