今年連環跳級升職嘅新地（016）樓神雷霆，官運暢通無阻，但賣樓進度就窒住窒住，屯門瓏門唔知係改錯名，抑或俾人整蠱，由3月中樓盤命名到家，一直未攞到預售樓花紙，始終未賣得。
雷霆踢緊嘅「樓盤預售波」，過咗愚人節、清明、復活節，繞過五一黃金周、食埋端午糉、7.1遊行埋，連學生哥嘅悠長暑假都就快完，始終未扭埋「龍門」。
搵埋中銀香港做show
雷爺噚日又話，瓏門真係喺好短期之內可以賣，只要搞埋少少簡單手續，就可以攞到預售紙，最快月底或者下個月初就賣得，中銀香港（2388）喺新界北區其中35間分行，仲會加設按揭諮詢中心，專門服侍呢個樓盤嘅買家。
今次搵埋銀行出嚟做宣傳，應該真係可以「短期」賣到喇啩？斷估樓神唔想過埋中秋、聖誕先有得露兩手！