曾參加六四集會的阿琳，不單未有被營中偏頗資訊影響，更向軍人「反洗腦」，多次犯禁講述六四及李旺陽事件；有解放軍得知六四屠城真相，大感意外，「佢話畀着係佢哋（解放軍入城），佢哋唔會咁做（開槍屠殺人民）。」
阿琳說，軍人對敏感政治話題非常有興趣，「佢哋好多嘢都想知，但冇乜途徑；因為佢哋喺內地（資訊）封鎖，知道我哋呢度比較自由，但羣力唔想我哋同啲軍人咁多接觸，講明六四、李旺陽唔俾講，我哋咪趁步操完，小息同佢哋講囉。」
聽到六四屠城，解放軍反應很大，「佢哋想知多啲內情，聽到之後覺得好驚訝，唔知原來有啲咁嘅事，話如果畀着係佢哋，佢哋唔會咁做。」
阿琳形容軍人其實很有人情味，只是對政治議題一無所知，「軍人對我哋好好，好照顧我哋，盡量唔畀我哋淋雨同曬親；一落雨佢哋就跑返房幫我哋拎雨衣，條路仲要幾遠，所以走嗰陣好多人都喊，唔捨得軍人，唔係唔捨得個camp。」夏令營洗腦事件被爆出後，羣力資源中心見勢色不對，早前向營友發出電郵，呼籲大家不要向傳媒提供相片，中心至今未回應本報查詢。
《蘋果》記者