咩叫深不可測？英超冠軍曼城就有啲咁嘅感覺，周日英超開鑼戰主場以3:2險勝修咸頓，係曼城連續3場正式比賽贏呢個比分，都曾經落後而反勝，領隊文仙尼睇嚟大把在手，唔怕玩過山車。下場聯賽作客利物浦，曼城又想開邊瓣呢？
連續3場反勝3:2
捧曼城嘅球迷真係心血少啲都唔掂，上季尾英超煞科戰，靠迪斯高同阿古路補時階段入波，先反勝昆士柏流浪3:2，取得英超冠軍。今季社區盾又係反勝車路士3:2，勢估唔到聯賽第一戰又翻冧呢個波膽。8分鐘阿古路膝傷退下火線，大衛施華之後射失12碼，不過曼城仲可以靠泰維斯40分鐘建功先開紀錄；泰仔連續兩仗入波，繼續玩底線露底tee，今次就紀念佢長大嘅布宜諾斯貧民區盧加奴（Lugano）。
但成班曼城球員玩玩吓，下半場初段基捷基治、迪斯高及大衛施華連番失機，修咸頓雖然係升班馬，都唔好當佢哋流，列基林拔同史提芬戴維斯後備上陣即各建一功，反超前2:1㖭。你話文仙尼有運又好，老定又好，總有辦法反敗為勝，迪斯高靠門前混戰建功，追成2:2；80分鐘拿斯尼做功臣，勁射入網反勝3:2，1.09倍主W終於開得出，不過買咗1.4倍「讓球主客和」「主勝」嘅球迷，就講句sorry。話時話，曼城球員真係好鍾意入波後show有字底衫，拿斯尼入波後就展示「EidMubarak」（開齋節快樂），呢個係回教徒嘅大節日，咁啱真係入咗佢今季英超第一球。賽後拿斯尼就講，以後都係贏1:0、2:0好啲。
阿古路至少唞一個月
曼城下周日就要作客利物浦，雖然阿古路喺個人Twitter表示傷勢冇預期嚴重，但睇嚟至少要休息一個月，對紅軍唔使預佢；但曼城仲有識入波嘅泰維斯、拿斯尼等，紅軍首戰就吞3蛋，丹尼爾艾格希望就紅牌上訴，文仙尼呢場又想唔想再玩後上反勝呢？