劉嘉玲與劉德華昨日以評判身份，到尖沙嘴會晤10位應屆候選港姐。嘉玲以單肩迷你裙艷壓眾港姐，她坦言當年因為廣東話不好，以及過不了穿泳衣關口，改而參加訓練班。提到現年50歲的劉德華有意回巢拍偶像劇，嘉玲聽後失笑說：「佢依然係我嘅偶像，但係佢係咪做到啲teenager（青少年）？好厲害喎。」
劉嘉玲昨日與劉德華到尖沙嘴，以評判身份與10位應屆候選港姐見面，嘉玲曾任港姐評判，問她審美準則，她說：「美貌同智慧當然要並重，但家科技好發達，所以要有足夠EQ面對新聞。」嘉玲稱今次令她回想當年參加訓練班的情景，問到有否想過參加選美，她笑說：「我冇呀，嗰個年代我啲思想太保守，而且廣東話又講得唔好，所以我嘅命運就行咗另一條路，我覺得都唔差呀。」
「黃宗澤有殺傷力」
有指劉德華將會回無綫拍劇，問嘉玲有否興趣，她說：「係咩？冇人同我傾過喎，不過我係好開放，如果適合又有興趣都會去做，尤其係無綫，佢始終係我嘅搖籃，點都有啲感情分。」即使酬勞不高，嘉玲也坦言不介意：「我家好幸運地係睇劇本，而唔會睇價錢。」華仔曾笑稱回巢拍偶像劇，嘉玲聽後失笑說：「佢依然係我嘅偶像，但佢係咪做到啲teenager？好厲害喎，不過佢都係鐵人，係一個傳奇，你睇佢都唔老。」
嘉玲定一定神後續說：「都幾好笑喎，我冇諗過拍偶像劇，反而講都市女性嘅生活，似乎啱我多啲，劉德華梗係首選合作對象，其次係黃宗澤，我覺得佢有殺傷力。」
至於華仔的選美準則，他坦言依然是長髮，是否知道老友湯鎮業的侄女湯洛雯參選？華仔說：「我知呀，但唔會加分，我好公正，表現好一定會畀，不過我哋未見過，我連阿湯都少見，各有各忙。」
華仔都想拍《賭神》
對於王晶有意開拍《賭神》四部曲，拉攏周潤發與謝霆鋒合作進軍內地，華仔說：「我諗係另一個故事，不過如果搵我都有興趣，但可能要另一個故事，唔再係刀仔。」
採訪：何慧斯
攝影：陳慧安
