黃金盛女佘詩曼昨日到銅鑼灣擔任剪綵嘉賓，好姊妹湯盈盈年底結婚，阿佘興奮非常，更表示樂意與盈盈樂樂的蛇B上契。阿佘透露現在沒拖拍，家中弟兄均已婚有小朋友，故媽咪沒催婚，她表示不用搵有錢男友，若搵到理想對象，不排除效法梁詠琪閃婚。
佘詩曼昨日身穿黑色tubedress現身銅鑼灣，為瑞士腕錶新店任剪綵嘉賓，阿佘獲大會送贈鑽石錶作答謝，她說：「價值唔重要，心意最緊要，自己都愛收藏錶，最貴嗰隻都有六位數字。」同場還有卓韻芝的韓國緋聞男模男友宋斗煥（Song）行騷。阿佘好友湯盈盈奉子成婚雙喜臨門，阿佘即笑說：「噚晚（即前晚）佢終於現身，我恭喜咗佢，祝佢早日生蛇B。」
男友不分國籍
兩女份屬友好，問阿佘會否做契媽，她說：「如果佢邀請我，會做。本身有四、五個契仔女，好多朋友都生咗BB。」何時才有計劃結婚，她即笑說：「連湯盈盈都結婚，我要壓軸，不過家冇拖拍，結婚都係隨緣。」
記者提議阿佘返內地結識富二代，阿佘說：「冇，啲對手都唔係富二代，錢唔係最重要，最緊要開心，溝通到，見到佢會笑。」問到佘媽有否向她施壓，她說：「哥哥同細佬都結咗婚有小朋友，冇壓力。」阿佘笑言未需要到婚姻介紹所搵對象：「順其自然，唔限圈內圈外，最緊要坦誠，互相尊重。」會否效法梁詠琪閃婚，她笑說：「唔知，搵到理想可能會，到時先算，自己到家都冇試過外國人，乜嘢年紀、人種都唔係問題，最緊要溝通、夾到。」
跟華仔返無綫
此外，劉德華笑言想返無綫拍偶像劇，阿佘說：「如果有佢，我都想，求之不得，佢真係我偶像。」記者笑她暗戀華仔，她說：「唔好咁誇張，試過有次頒獎典禮佢頒獎畀我，我有啲心跳加速。」
採訪：盧妹攝影：林德雄