達明一派喺亞洲博覽館嘅一連兩場演唱會前晚完成，捧場嘅有何韻詩同父母、盧凱彤、王賢誌等，王賢誌身邊仲有位心口有紋身嘅猛男，嚟自政界嘅觀眾就有梁家傑同長毛梁國雄等。達明唱《禁色》時，明哥話每次都好感觸，擔心有日玩音樂都犯法俾人拉，正如俄國女子組合PussyRiot早排唱歌反對總統普京，結果三個成員被判入獄，前晚明哥同劉以達就喺面寫上「FreePussyRiot」，希望有關方面釋放三人。
遭網友攻擊
明哥自爆曾被網友攻擊：「網友留言叫我『管好自己，胡說，要自由民主去移民，或者直接上天堂，你唔可以代表700萬人。』仲有一段話『怎麼又談國民教育，不喜歡中國，移民英國做走狗，國民教育勢在必行。』睇完我想送《愛的教育》呢首歌畀佢哋。」
學民思潮嘅黃之鋒前晚再做嘉賓，佢帶領觀眾大叫「梁振英、撤回」。完騷時問達明會唔會擔心個騷喺內地做唔到？明哥話：「一騷兩制，喺香港做梗係講香港人。」
