有中國金花之稱嘅李娜，舊年歷史性喺法網封后後，唔知係咪心理壓力關係，一直未能再奪冠。經過15個月嘅冠軍荒後，佢下咗個狠心決定︰炒老公魷魚，搵咗個老外做教練，結果兩人一拍即合，第一次合作即凱旋而歸。李娜接受訪問時都講，老公兼做教練，令佢覺得好迷惘，練得辛苦嘅時候，會埋怨邊有老公咁對老婆，但又心知「落場無父子」嘅道理。事實上，我哋有陣時炒股，都會有低潮期，買完就跌、沽完就升嘅例子比比皆是，如果遇到咁嘅情況，唐牛通常都會選擇休戰，或者小注怡情，調整一下心理狀況再踏征途，增加勝算。
業績股繼續成為市場焦點，全球顯示屏一哥冠捷（903），將於今日公佈業績，集團首季盈利倒退五成，但股價已反映有關因素，從PB得番0.25倍可見一斑，冠捷噚日俏升2.7%，再度突破10日線，戰友可實份成績表，如果股價能夠突破50日線（昨處1.53元），不妨跟進。
唐牛