蘋機會：Sharp行貨回歸　$2,980玩巨芒

日系手機一向都係唔少潮人的另類有型之選，不過多數得水貨玩，無中文、無保養始終令人有點卻步。沉寂多年，Sharp行貨終於回歸香港，更挾住5吋巨芒、雙SIM支援、特有介面殺入機界，加上開價唔使三千，日系老牌有力一戰㗎！

記者：韓繼聰
攝影：伍慶泉
模特兒：Ruby@InterplayWorkshop

5吋巨芒　光度夠解像度稍弱

自從一系列智能手機高速湧現，曾經都叫潮過一陣嘅Sharp手機即刻無晒影，行貨更係完全撤出香港。經過多年醞釀，呢個日系老牌終於回歸，而頭炮就係呢部SH530U。睇外形，呢部頭炮都算幾搶，白色粉紅色靚仔夠Young，Size更係巨無霸級，配備5吋巨芒，拍埋部三星Note度，大細差不多。當年Sharp出名芒靚，呢部唔知表現又如何？拼一拼，唔難發現SH530U比Note的解像度明顯差啲，畢竟480×800WVGA同Note的800×1,280WXGA有一段距離，播片時清晰度及對比度更見差別。但佢又未算輸得晒，事關睇相睇網頁時，SH530U光度竟然更勝Note，顏色亦相對自然準確，Sharp血統果然留得住。加上一個無得輸位，就係價錢，$2,980玩到巨芒，平Note一大截，邊度搵？

■9.9mm厚機身拍埋Note差不多，只係輕微厚少少，算好揸手。

雙卡雙待　獨有介面

除咗大芒，SH530U更有雙SIM卡雙待，呢個一般大牌少有嘅功能。3G及2G可同時運作，啱晒啲有私人電話又有公司電話，或者成日去外地及北上嘅大忙人。另外SH530U預載Android4.0同時，亦配備自家研發的SharpFeelUX介面。在屏幕上鎖時亦能查看天氣、股價等，亦可快速啟動相機、電話等功能，同時亦簡化了內裏的功能頁面，用起嚟相當方便。外形上，一體成形加磨砂質感嘅機身，算幾有型，不過就硬係少咗啲日系機感覺，唔少網民更話有強國Feel。不過，都係嗰句，三千有找有巨芒雙核，仲想點？而據代理講，年底前Sharp將會再有行貨新機到港，希望到時會有更勁嘅靚機推出喇。