馬季近年延長，唞暑日期縮短，好多馬圈中人把握時機，七月十五日過後就去咗旅行，事關馬匹在八月上旬已經全面開機，準備九月八日開鑼賽事。
馬主Ｎ去咗澳洲大半個月，最近至返嚟，叫去Domani食芝士，梗係制啦。問佢去咗邊，佢話首先回雪梨探親小住，跟住參加馬主協會主席PaulWrobel（陸家進）組織之「墨爾本賽馬教育團」，到南澳洲參觀馬場兼遊覽，團員一共三十人，七月三十一日自香港出發，抵達墨爾本之後，展開行程緊密嘅參觀活動，第一站係國際級退役冠軍馬之LivingLegends，特別與「精英大師」拍照留念。
第二站係著名南半球販馬公司WilliamInglis&Son，位於Oaklands之拍賣會場，董事向各人講解買馬須知事項，到「魚子精華」酒吧飲兩杯。（按：創世界紀錄二十二連勝之馬后「魚子精華」就是在這拍賣場售出的！）
第二日去咗前香港著名練馬師大衞希斯之「靈犀牧場」，希斯親自接待，解釋馬匹訓練過程，返到墨爾本就入住CrownMetropol，到有地獄廚神之稱嘅MrHiveKitchen&Bar享受豐富晚餐。當地馬圈人甚為重視香港馬主協會到訪，八月四日滿利谷馬場特別安排其中一場賽事為「香港馬主協會錦標」，滿利谷馬會副主席及行政總裁識做到極，親自到廂房向馬主協會諸公致謝。
馬主Ｎ話此行既輕鬆又有賽馬教育性，遊山玩水吃喝玩樂之餘，學曉不少育馬、買馬、練馬、養馬之基本知識，對各位馬主好有啟發性，以後買馬返香港交俾練馬師，可以同練馬師有更多有益有建設性嘅交流，唔會係單向溝通。馬主Ｎ話陸家進會長係旅遊界資深人物，呢次親自帶隊，一切行程安排妥善，梗係人人高興啦。呢個旅行團本來左丁山有意參加嘅，可惜因另有他事最後去唔成，聽馬主Ｎ咁講，為之大嘆走寶。香港馬主大把人吼，返到寫字樓，北海道馬場方面已送來兩套自八月二十日開始嘅北海道夏季拍賣會資料，哎吔，八月去北海道自駕遊兼參觀馬場夠晒正斗，之不過又係行唔開呢！