咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
-牛腩篇-
歐洲經濟低迷，不過十隻手指都有長短，西班牙就肯定係差個批；失業率高企、銀行傳缺水，足球隊又邊有運行。西甲今周開鑼，皇馬、巴塞主場出擊，都見到觀眾席坐滿人，不過直播所見，切爾達、馬略卡都好多吉位，咁又係，經濟唔好，西班牙人又邊有心情睇波。
以往西班牙球員出國搵食並不普遍，哥迪奧拿、文迪達算大名，都係踢拉丁語系嘅意甲，魯爾都係臨老先轉會史浩克04。
而西班牙球員一向畀人印象，技術就夠，對抗力麻麻，所以英超唔多見；但隨住費托、沙比阿朗素，到近年桑馬達、大衛施華、迪基亞嘅成功，西班牙兵喺英超越嚟越吃香。
今季就有4名西班牙兵登陸英超，「貴價牛」辛迪卡索拉首戰合格有餘，不過就點都及唔上「平價牛」米捷；米捷上季幫華歷簡奴入13球，今季首仗幫史雲斯上陣，就省入兩粒，200萬鎊轉費會抵到爛。而史雲斯號稱英超巴塞，崇尚地面進攻，今季加入埋另一西班牙後衞捷高，及有西甲經驗嘅約拿芬迪根斯文，絕對唔係嘢少。
讚完米捷，小弟就不禁擔心，連西甲二線球星都畀英超搶埋，西甲只係越嚟越「蘇超化」，巴塞、皇馬有得鬥，充其量加埋華倫同馬體會。
文：牽牛