輸咗爭產官司嘅風水師陳振聰，雖然話改信耶穌，但始終要面對超過5億嘅訴訟債務，放售物業可能先幫到吓手。據聞，陳振聰喺中半山寶雲道16號嘅舊居地皮噚日開始公開招標，市場估值4億。
查實陳振聰呢個楠樺居舊址今年一直喺市場暗中放盤，意向價最高5億，一直冇承接，噚日終於以公開招標方式出售，截標日期係9月12號。
陳振聰家族1993年用4928萬買入呢個物業，以WealthyLandInvestmentLimited名義購入，公司董事係陳振聰兄弟陳振鴻同陳振國，又攞阿爸陳汝楠及阿媽李葉樺個名，命名「楠樺居」，原有建築物已經拆咗，可重建樓面約1萬5447方呎。陳生今次真係要講句願主保祐！