退休資深賓架黃遠輝原來好鍾意「影後」！佢最近同家人、朋友去非洲肯雅玩咗五日，返嚟將百幾張相擺上面書，其中一張，佢同黃太企喺草原望住晚霞美景嘅「影後」照，相當有情調，俾人like爆。
呢張相原來係黃遠輝精心設計，每逢見到靚景，佢都會設計呢類「影後」相，已經儲落唔少。黃遠輝話，退休後，有好多地方想同黃太一齊遊歷吓，今次同朋友籌劃咗大半年先起行，一行15人，當中有幾位鐵腳旅友，係渣打舊同事。
下一站睇北極光
佢哋今個月11號先返香港，錯過唔少倫奧精彩賽事，但佢話睇到獵豹呢種地球「飛人」，仲正過4D立體睇奧運。去完非洲，佢同黃太下一站想去睇北極光，唔知用北極光做背景嘅「影後」相係點嘅呢？