公屋改裝消防通道變泊車位，過往曾導致延誤救援事件。消防職工總會副主席謝守龍稱：「最常見係啲車阻住街水井位，攞唔到水。最怕係未有事發生前有泊車，但發生事嗰時啲車又唔走，到時先解決就十分困難。」
雖然目前消防處未就火場道路被阻塞作詳盡記錄，但確曾發生因泊車問題影響工作。
謝守龍最擔心的是，不能在最接近災場的地點進行救援：「路面係有消防通道規定，最大問題有人唔守交通規則違法泊車，導致有事發生時，我哋嘅大車，例如鋼梯入唔到災場，阻遲救援工作；加上我哋嘅裝備好重，消防車去唔到災場係直接影響救人效率，令求救者受痛苦同解除災劫嘅時間長咗，對任何市民嚟講都唔公平。」他呼籲有關政府部門應及早處理問題。
到過石籬邨視察的石籬區議員林紹輝表示，該處車位已存在十多年，亦曾收到有關投訴：「呢啲車位由房署負責租出同收錢，房署要向公眾交代點解唔合法都照租照收錢。人命關天，通道只得五米唔合消防標準，氣墊都難開阻礙救援，有事叫市民去邊度追討？咁唔止係搶錢，仲係帶頭唔守法。」他認為，房署做法不能接受，應盡快糾正。
《蘋果》記者