咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
-咖喱篇-
首次同大家見面，分享個有趣數據先，原來首周英超有兩個浪射王，同樣一場射咗8次都冇波入；結果佢哋隊波都係俾人炒鑊金！呢兩位仁兄分別係昆士柏流浪嘅泰拉拔同利物浦嘅蘇亞雷斯（阿蘇）。
今日主要講吓利記嘅問題，睇番上季，佢哋把握力麻麻，667次射門先入47球，把握力得7%；而曼城有13%，宿敵愛華頓都有10%。今季換咗領隊後，呢個問題都係冇改善，啱啱嗰場輸畀西布朗0:3，可能係同打少個有關，但係16次射門得兩次中目標，一球都入唔到，我諗呢樣同打少個冇咩關係。
細心嘅讀者會留意到阿蘇一個就包辦咗利記一半嘅射門。不過，阿蘇嘅特點大家都好清楚，佢最叻做突破，但埋門就麻麻。作為領隊，羅渣士冇理由唔知班球員嘅優點同缺點，呢場波佢搵阿蘇打中間，反而波連尼就成日走咗去左邊，成件事掉轉晒！
揚長避短，建議羅渣士將波連尼放番去中鋒位，等佢貼近龍門，射多啲波，試吓佢做唔做到終結者嘅角色；阿蘇唔怕多啲走去邊線，幫手拉空吓位，唔好成日諗住射。
最後，講樣嘢慰藉吓利迷，利記喺65/66球季都試過畀西布朗炒3:0，但嗰季利記係贏到聯賽冠軍，所以nothingisimpossible，唔使灰心呀！
文：咖喱