卓韻芝為求活出豐盛人生，唔怕死，唔怕網友鬧爆，繼續我行我素。阿芝近日埋首籌備兩個月後開騷的棟篤笑，絞盡腦汁炮製笑彈，向來喜愛集郵的她為了演藝事業，寧暫時戒色唔媾仔，孭住逾六千負評的她笑言期待向網友收集一億負評，搶做負評女王。 撰文：比華利
新一代才女卓韻芝腦筋轉數快，她懶理網友負評如潮湧，一於想做就去做，阿芝今年10月會在灣仔新伊館舉行「卓韻芝罪該萬死OneNightStand」棟篤笑騷，雖然一切還未準備，但訪問當天，阿芝講不停，似要為開騷熱身。
阿芝穿上印上自己肖像的小背心到來，她大力推介胸前的招積樣，她手指指說：「呢個樣真係撩打，好一個『欠揍樣』，我個騷英文名叫Idislikeyou。」阿芝在經剪裁的欠揍小背心內穿了白色tubetop打底，輕輕側身便露出胸圍印，有助手提場怕走光，阿芝豪氣說：「有戴咪有印，bra都係底衫一部份，唔使介懷。」
趕稿趕蒲趕仔
距離10月開騷只有兩個多月，爛玩芝開始收拾心情閉關，她說：「呢次個騷內容會係全新，我要開工度橋，閉關呢段時間我會好孤獨，最需要湯水嘅支持同朋友慰問。」阿芝自認忍耐力強，她續說：「我可以連續三、四日對住部電腦，一瞓醒就對，寫唔出都照對，寫唔到又會喊，但唔可以唔寫，我鍾意迫自己S&M關係，虐待吓自己，跟住就會咇到啲嘢出嚟。」閉關期間未能親親異性，豈非dry爆，阿芝大膽說：「閉關同仔唔會有反比，家互聯網咁盛行，仔唔使當面，我近排對中環同蘇豪區巿況冇時間劾察，我希望盡快寫完稿，可以出去update番自己。」
阿芝口口聲聲指自己罪該萬死，她又該當何罪？她說：「首先我要為自己嘅出生而道歉，我嘅出生已經係一個錯，每個人實有好多錯，但我選擇唔後悔，認真你就輸了。」網友對阿芝言行送上負評，令她累積負評逾六千個，她可覺送負評的網友也罪該萬死？她說：「呢方面我有一個明確態度，多謝大家畀我負評，每一個負評都係一個支持，六千個真係太少，一億畀唔畀到我。」阿芝表示現在愛儲負評，她說：「Fans最初好擔心，大家要有啲幽默感，我就冇乜所謂，負評後仍支持我嘅點都支持，唔支持嘅亦唔關負評事。」
「女仔唔係鵪鶉」
阿芝享受做棟篤笑騷，她說：「我要話畀大家知女仔都有勇氣拎一支咪就上台，唔使煙花效果、唔使起鼓、唔使dancers。女仔都可以有幽默感，唔係淨係鵪鶉同小器。」對自己要求高的阿芝不諱言未開騷便有無形壓力，但這股壓力絕對也是阿芝炮製笑彈的無限動力。
攝影：林德雄
化妝：MickyChoyofSuchagood
髮型：ZiggieofSalonLaMod
場地：SalonLaMod
外婆催結婚生仔
卓韻芝自喪母後，與高齡外婆相依為命，婆孫相處融洽，阿芝過去半年先後被爆戀上德、法和韓籍型男，看得外婆眼花繚亂，當然向孫女下催婚令，最近外婆更越級催阿芝生仔，令阿芝非常頭痕，她說：「阿婆催我快啲生仔，我同佢講我婚都未結喎。」
「就開有條癮」
阿芝有見外婆跟外公的婚姻美滿，便向外婆請教婚姻之道，阿芝說：「阿婆話搵到另一半要忍讓一生一世，佢睇韓劇太多。阿婆話兩夫妻好似朋友，就開就有條癮，我都希望快啲搵到呢條癮。」外婆希望阿芝癮起後早日脫離剩女行列。
現年33歲的阿芝與83歲外婆年齡差距半世紀，代溝卻無損婆孫情，彼此雖偶有拗撬，但阿芝口硬心軟說：「我點都要屈服佢魔掌之下，我就算拗贏都唔光彩。阿婆對世界每樣嘢都好奇，佢成八十幾歲人，都算係烈女。」阿芝有見粉絲愛屋及烏，勁冧外婆，所以不排除開騷時邀請外婆上台客串棟篤笑，她說：「阿婆一上到台，大家就識笑。」
攝影：陳志嵐
服裝：3.1PhillipLim
兩點嘟嘟嘟
卓韻芝不時以標奇立異裝束示人外，又最愛露兩點，但露的部位是眼皮上刻意加工的兩點新妝，她更視此為個人icon，阿芝說：「我keep住3年幾，試過化到好大粒，呢兩點就好似我哋着衫咁，鍾意咪點上去。」
愛浮誇的阿芝打算把兩點發揚光大，她忽發奇想說：「我想將佢哋多元化，唔排除會玩變色、立體、螢光或夜光，但最想就係將佢變成QRcode，見到攞個電話擺上去，馬上彈去條link，我又想將佢變成八達通，去搭港鐵嘟吓就入閘，兩點真係功能多。」
卓韻芝罪該萬死OneNightStand
時間：10月11日及12日
地點：灣仔伊利沙伯體育館