無綫藝員林淑敏兩年前生乳癌，幸好醫番好康復，噚日佢喺銅鑼灣出席維特健靈分享會，林淑敏話病過之後好想做以前唔會諗去做嘅事，其中一樣係跑馬拉松。另一樣林淑敏好想做嘅就係結婚，暫定明年2月，佢話：「想喺教堂行禮，但男友唔係基督徒，要先通過牧師嗰關，唔得就喺沙田簽紙就算。」林淑敏同男友拍拖12年，病時曾主動提出分手唔想拖累人，又知道自己生唔到BB，但結果男友對佢不離不棄。