有讀者陳先生來電郵問及（一）紫微揚（楊）是否就是李青揚，（二）左丁山會否替人算命。兩個答案都係NO，紫微揚（楊）不是李青揚，本人不會替人算命，請另找高明。
一位讀者Thomas話晚上在油麻地果欄見到工人在馬路開工拆櫃搬運水果，情況危險，滋擾附近居民，點解區議員、食環署人員視而不見，從不干預，將果欄搬去安全地方？呢樣左丁山唔識答，油麻地果欄歷史悠久，工人習慣晒，果商鍾意方便，要佢地搬走，恐怕又會引發一場激烈抗爭，既然咁多年無重大意外發生，邊度有人想改變現狀㗎，至於滋擾居民喎，如果你唔係，未聞果欄附近居民有強烈抗議聲噃。
以地論地，油麻地果欄拆卸重建，應該值好多錢，不過改建問題往往好複雜，外人難以了解。
昨日由樓價講到通脹，一位年青人曾問左丁山通脹有幾可怕呀，家中國有通縮風險噃，日本政府直情希望物價上升㖭。通脹之破壞性，難以簡單地解釋清楚，最好有得睇。嗱，灣仔喜萬年酒家有一間房，叫做上海廳，裏頭有兩組相片掛在牆上，一組係今日繁華上海之高樓大廈照，無甚足觀，另一組就係歷史老照片，反映一九三○、四○年代之上海面貌，其中有一幅照片值得留意，一位肥胖掌櫃在數銀紙，紙幣在佢左右兩旁堆積有兩呎高，一紮紮咁亂放，你估係好多錢呀？其實幾大堆錢加埋都冇乜購買力。先父曾講過佢在一九四七年四八年左右去茶樓飲茶，要帶備一藤喼金圓券去找數，銀紙日日貶值，人人爭相消費買實物，唔敢留現金在身，先父常嘆息云，國民黨敗走大陸，蔣介石不用白崇禧是第一因素，金圓券瘋狂通脹，令人民信心盡失，是第二因素。左丁山一輩唔知當年通脹情況，但在喜萬年上海廳睇幅掌櫃數銀紙照片，可以想像一二。上星期有人送左丁山一本各國「散紙錢幣樣本紀念冊」，內有一張銀紙面值一百萬億元（OneHundredTrillionDollars），左丁山歎為觀止。呢張紙幣由津巴布韋儲備銀行（ReserveBankofZimbabwe）在2008年發行，當年發行咗四款紙幣，即10萬億、20萬億、50萬億與100萬億，是為第三代津元，2009年發行第四代津元，08年嘅100萬億元可兌換09年之100元！咁嘅超超級通脹，問你驚未！