長實（001）喺中半山嘅超級遠期樓花豪宅「君珀」好受內地影圈歡迎，大導馮小剛個老婆徐帆、金馬影帝張涵予先後入貨，大馬萬華媒體（426）已故主席張鉅卿大仔張昌亦新近都攞咗8524萬買咗間。君珀屬舊契物業，成幢得50伙，全部超過二千呎，暫時大約賣咗13間。長實由賣樓到家，一直無正式公佈價單同付款方法，政府土地註冊處出咗資料，先知賣咗嘅單位價錢，透明度極低。
遠赴摩洛哥sell客
冇明確價單，內地明星都湧去買，估計好大原因係個盤位於中半山傳統豪宅區，呢區新供應少之又少。而且個盤2014年先落成，呢類遠期樓花最啱投資者脾胃，可能畀低些少錢做首期，就可以做半山豪宅業主。
聽聞長實早排透過唔少國際物業代理行向海外投資者推銷搵客，倫敦、紐約、新加坡、北京、上海固然之要去，連俄羅斯、摩洛哥亦去埋，睇嚟發展商都知呢類超大價盤嘅目標客戶越嚟越國際化。